Policia e Kosovës ka konfirmuar se është duke hetuar katër raste vdekjeje të ndodhura brenda një harku 24-orësh, gjatë ditës së hënë. Dy prej këtyre rasteve janë cilësuar si vdekje të dyshimta, duke ngritur shqetësime për rrethanat e ndarjes nga jeta të viktimave.
Sipas raportit 24-orësh të Policisë, rastet janë regjistruar në komunat Obiliq, Istog, Skenderaj dhe Zveçan.
Në Obiliq, një person është gjetur pa shenja jete në orët e para të mëngjesit të së hënës. Mjekët kanë konstatuar vdekjen në vendin e ngjarjes, ndërsa prokurori ka urdhëruar që trupi të dërgohet për obduksion në Institutin e Mjekësisë Ligjore (IML).
Në Cerkolez të Istogut, një tjetër person është gjetur i pajetë brenda automjetit të tij në orët e pasdites. Edhe ky rast është në hetim si “hetim i vdekjes” dhe trupi është dërguar për obduksion.
Në Skenderaj, konkretisht në fshatin Prekaz i Poshtëm, një burrë është gjetur i vdekur, ndërsa rasti është cilësuar si vdekje e dyshimtë. Mjeku ka konfirmuar vdekjen në vend, dhe trupi është dërguar në IML.
Në Zveçan, në rrugën “Mbreti Pjetër”, një person është gjetur pa shenja jete pranë shtëpisë së tij. Edhe ky rast është kategorizuar si vdekje e dyshimtë, dhe është dërguar për ekzaminim mjeko-ligjor.
Autoritetet kanë nisur hetimet për të sqaruar rrethanat e secilës vdekje. Obduksionet pritet të ndihmojnë në zbardhjen e shkaqeve të sakta, ndërsa Policia dhe Prokuroria janë në pritje të rezultateve për të marrë hapa të mëtejmë, nëse konstatohen elemente penale.