Hasan Rrahmani, një shqiptar me prejardhje nga Kosova dhe banues në Haslemere të Anglisë, ka ndërmarrë një udhëtim të jashtëzakonshëm: mbi 2,200 kilometra me biçikletë nga Surrey në Prishtinë, për të nderuar kujtimin e babait të tij, Emin Rrahmani, i cili ndërroi jetë nga kanceri në pankreas.
Historia prekëse e Hasanit është publikuar nga BBC, e cila ndan detaje për këtë iniciativë emocionale dhe qëllimin fisnik – mbledhjen e fondeve për bamirësinë Pancreatic Cancer UK.
Hasan Rrahmani, i cili është me origjinë nga Kosova, u largua nga vendi kur shpërtheu lufta në vitin 1999 dhe pas muajsh zhvendosjeje, familja erdhi në Mbretërinë e Bashkuar, shkruan BBC, transmeton Gazeta Shneta.
Babai i Hasanit, Emin, jetonte në Hendon, por vdiq në vitin 2019, në moshën 71 vjeç, vetëm katër javë pasi u diagnostikua.
Në nëntor të vitit 2019, Emini ndihej shumë i lodhur, por ai ia atribuoi këtë diabetit të tipit 2 dhe moshës, por ndërsa ishte në një udhëtim në Kosovë, ai filloi të ndihej i dobët dhe jo mirë.
Ai shkoi te mjekët të cilët e këshilluan të kthehej në Angli. Dhimbja ishte aq e fortë sa ambulanca e mori menjëherë pas mbërritjes së tij nga aeroporti.
U urdhëruan skanime të cilat zbuluan se ai kishte kancer në pankreas.
“Kjo ishte një nga bisedat më të vështira”, tha Hasani.
“Fjalët thjesht nuk po më dilnin nga goja. Ai ishte përkulur përpara, duke u përpjekur të dëgjonte me vëmendje”.
“Ai e kuptoi që ishte kancer, por nuk e kuptoi ashpërsinë e sëmundjes. T’i thoja se i kishin mbetur javë jetë, ishte shkatërruese”, tha ai.
Hasani do të niset nga shtëpia e babait të tij në Hendon të dielën, me fqinjin dhe partnerin e tij të çiklizmit, Gary Lloyd.
Ata do të shkojnë në portin e Portsmouth-it përpara se të marrin tragetin për në Francë, dhe më pas do të shkojnë në jug drejt Zvicrës.
Pasi të kalojnë Alpet dhe të hyjnë në Italinë veriore, ata do të udhëtojnë me biçikletë në lindje drejt Ankonës dhe do të hipin në një traget për në Shqipëri.
Nga atje, ata do të kalojnë nëpër Maqedoni përpara se të mbërrijnë në Kosovë.
Udhëtimi ka të ngjarë të zgjasë 15-18 ditë, tha Hasani.
Ai shpreson që gruaja e tij, vajza e vogël dhe djali të mund të fluturojnë për ta takuar në shtëpinë e fëmijërisë së tij në Prishtinë, ku do të festojnë jetën dhe veprën e Eminit.
Kerry Thomas, drejtuese e mbledhjes së fondeve publike në Pancreatic Cancer UK, tha: “Jemi jashtëzakonisht mirënjohës që Hasani po na mbështet duke ndërmarrë këtë udhëtim shumë personal, drejt shtëpisë që u detyrua të largohej kaq shumë vite më parë”./Gazeta Shneta/