Prof. Dr. Alban Neziri, gjinekologu shqiptar nga Zvicra, i ka mundësuar realizimin për herë të parë të dy operacioneve të rralla tek pacientet me sindromën Mayer-Rokitansky-Küster-Hauser (MRKH).
Operacionet u kryen në bashkëpunim të ngushtë me drejtorin e klinikës, Dr. Zef Ndreaj, dhe stafin profesional të KOGj-së.
Pacientet e operuara kanë aplazi apo mungesë të mitrës dhe të vaginës, të diagnostikuara me Sindromën Mayer-Rokitansky-Küster-Hauser (MRKH), një anomali kongjenitale e organeve gjenitale që karakterizohet nga moszhvillimin e mitrës dhe vaginës gjatë fazës embrionale.
Operacioni u realizua me krijimin e një neovagine sipas metodës Ëharton-Sheares-George, një teknikë e specializuar që ofron mundësinë për përmirësimin e cilësisë së jetës tek pacientet.
Ky sukses përfaqëson një hap të rëndësishëm drejt avancimit të shërbimeve shëndetësore në vend dhe hap perspektiva për trajtime të mëtejshme në qendra evropiane të specializuara, përfshirë mundësinë e transplantimit të mitrës në të ardhmen.
Prof. Dr. Alban Y. Neziri, me rastin e realizimit të këtyre operacioneve, deklaroi se ky është një hap i rëndësishëm për shëndetësinë kosovare.
“Ky është një hap i rëndësishëm për shëndetësinë në Kosovë. Jam i nderuar që së bashku me kolegët e QKUK-së, dhe veçanërisht me bashkëpunimin e ngushtë të drejtorit të klinikës, Dr. Zef Ndreaj, patëm mundësinë të realizojmë me sukses këto ndërhyrje të ndërlikuara tek pacientet, të cilat u japin atyre një perspektivë të re për jetën dhe shëndetin e tyre. Ky sukses tregon se me bashkëpunim dhe përkushtim profesional mund të arrijmë standarde të reja në mjekësinë tonë”, ka thënë Neziri.
Drejtori i Klinikës së Gjinekologjisë, Zef Ndrejaj, ka thënë se këto dy operacione janë shembull se si mund të arrihet kur bashkohen përvojat e mjekëve.
“Operacionet u zhvilluan me sukses, duke shërbyer si shembull se sa shumë mund të arrihet kur bashkohen përvoja dhe dëshira për të ndihmuar pacientët tanë. Në emër të klinikës, falënderoj Dr. Alban Neziri për ndihmën dhe mbështetjen e dhënë. Jemi të hapur dhe të gatshëm që edhe në të ardhmen të mirëpresim bashkëpunime të tilla me mjekë shqiptarë nga diaspora, gjithmonë për interesin më të mirë të pacientëve tanë”, ka deklaruar Ndrejaj. /Gazeta Shneta/