Një tërmet i fuqishëm me magnitudë 6.9 goditi Filipinet qendrore mbrëmjen e së martës, duke shkaktuar të paktën 69 viktima dhe plagosur shumë të tjerë.
Qeveria ka nisur përpjekjet për kërkimin e të mbijetuarve dhe rikthimin e furnizimit me energji elektrike dhe ujë.
Në Bogo, një qytet bregdetar në provincën Cebu me rreth 90,000 banorë, janë regjistruar të paktën 14 viktima, ndërsa spitali lokal është mbingarkuar. Autoritetet paralajmërojnë se numri i viktimave mund të rritet.
Në San Remigio, pranë Bogo-s, 5 persona humbën jetën pasi muret u shembën gjatë tentativës për t’u larguar nga zonat e rrezikuara, sipas kryetarit të bashkisë, Alfie Reynes.
Ai bëri thirrje për ndihma me ushqim, ujë dhe pajisje kërkim-shpëtimi, pasi sistemi i ujësjellësit u dëmtua nga lëkundjet.
Instituti Filipinas i Vullkanologjisë dhe Sizmologjisë lëshoi një paralajmërim për cunami dhe u kërkoi banorëve të qëndrojnë larg vijave bregdetare.
Tërmeti ndodhi vetëm pak ditë pas kalimit të dy stuhive të forta, Bualoi dhe Ragasa.
Filipinet janë një nga vendet më të rrezikuara në botë nga fatkeqësitë natyrore, për shkak të vendndodhjes së tyre në “Unazën e Zjarrit” të Paqësorit, një zonë me aktivitet të lartë sizmik dhe vullkanik.