Komisioni Europian po shqyrton një propozim për krijimin e një fondi që do të ndihmojë gratë të kenë akses në abort të sigurt kur ligjet e vendit të tyre e bëjnë të pamundur këtë.
Iniciativa vjen pas një fushate qytetare që mblodhi më shumë se 1 milion nënshkrime në të gjithë BE-në.
Rasti i Mirela Čavajdës nga Kroacia, e cila në javën e 26-të të shtatzënisë zbuloi një problem serioz shëndetësor të fetusit, nxiti debate publike.
Pavarësisht se aborti është i ligjshëm në Kroaci deri në javën e 10-të, ajo u detyrua të udhëtonte në Slloveni për të kryer procedurën, duke shpenzuar rreth 5,000 euro.
Aktivistët e lëvizjes My Voice, My Choice kërkojnë nga Komisioni që të krijojë një mekanizëm financiar që do të mbulojë shpenzimet e udhëtimit dhe procedurave për gratë që nuk mund të kryejnë abort në vendin e tyre.
“Ne duam që gratë ose OJQ-të të mos kenë më nevojë të paguajnë vetë për këto procedura”, tha Nika Kovač, udhëheqëse e lëvizjes.
Komisioni pritet të japë një përgjigje zyrtare deri në mars 2026, ndërsa pjesëmarrja e shteteve anëtare do të jetë vullnetare dhe fondi mund të mbështetet financiarisht nga BE-ja. Megjithatë, çështja mbetet e ndjeshme, pasi disa vende e konsiderojnë abortin një temë morale dhe fetare.
Komisioni ka theksuar se iniciativa nuk synon të krijojë një të drejtë të përgjithshme për abort në nivel BE, por të mbrojë shëndetin dhe jetën e grave që përballen me kufizime në vendet e tyre./Gazeta Shneta/