Kanada ka humbur statusin e saj të eliminimit të fruthit, pothuajse tre dekada pasi u shpall për herë të parë e lirë nga kjo sëmundje shumë ngjitëse në vitin 1998.
Që nga tetori 2024, vendi po përballet me një shpërthim të madh të fruthit. Vetëm gjatë këtij viti janë raportuar mbi 5,100 raste dhe dy viktima në dhjetë rajone të ndryshme. Agjencia Kanadeze e Shëndetit Publik njoftoi se i është hequr statusi “pa fruth” pasi i njëjti variant i virusit ka qarkulluar pandërprerë për më shumë se një vit, raporton Euronews Health transmeton Gazeta Shneta.
“Megjithëse përhapja është ngadalësuar kohët e fundit, shpërthimi ka vazhduar mbi 12 muaj, kryesisht në komunitete me shkallë të ulët vaksinimi,” thuhet në deklaratë.
Sipas të dhënave kombëtare, 88% e rasteve këtë vit janë regjistruar tek persona të pavaksinuar. Fruthi është aq ngjitës sa një person i pavaksinuar mund të infektohet edhe nëse hyn në një dhomë ku një i sëmurë ka kollitur apo teshtitur deri në dy orë më parë.
Ekspertët theksojnë se të paktën 95% e popullsisë duhet të jetë e vaksinuar me dy doza për të parandaluar shpërthimet dhe për të mbrojtur individët që nuk mund të vaksinohen, si foshnjat.
Agjencia kanadeze po bashkëpunon me Organizatën Panamerikane të Shëndetësisë për të rritur normat e vaksinimit dhe për të përmirësuar sistemet e monitorimit. Kanada mund ta rimarrë statusin e saj nëse arrin të ndërpresë përhapjen e virusit për të paktën një vit.
Shpërthimi i saj ndodh paralelisht me një rritje të rasteve në Evropë, ku në vitin 2024 u raportuan mbi 35,000 raste – dhjetë herë më shumë se një vit më parë, sipas Qendrës Evropiane për Parandalimin dhe Kontrollin e Sëmundjeve. /Gazeta Shneta/