Gjatë ditës së sotme, Oda e Stomatologëve të Kosovës ka mbajtur mbledhjen e rregullt të Kuvendit, ku janë miratuar një sërë vendimesh që përcaktojnë drejtimin e punës së institucionit.
Sipas njoftimit, kuvendi ka miratuar raportin gjashtëmujor të punës së organeve të OSK-së për periudhën janar–qershor 2025, si dhe raportin financiar për të njëjtën periudhë, duke vlerësuar zbatimin e objektivave dhe transparencën buxhetore, raporton Gazeta Shneta.
Po ashtu, është aprovuar projektbuxheti dhe plani i punës për vitin 2026, të cilat synojnë avancimin e mëtejshëm të shërbimeve dhe rritjen e efikasitetit organizativ.
Tutje, pjesë e rëndësishme e punimeve ishte edhe shqyrtimi i plotësim-ndryshimeve të akteve normative, me qëllim të përmirësimit të funksionimit të organeve dhe të komisioneve të përhershme të Odës.
Ndër vendimet kryesore, Kuvendi miratoi Statutin e përditësuar të OSK-së, i cili ka qenë më herët në diskutim publik, duke i mundësuar komunitetit të stomatologëve të kontribuojë me komente dhe sugjerime.
Ky statut i ri është harmonizuar me Ligjin për Profesionistët Shëndetësorë dhe përfaqëson një avancim të rëndësishëm në mbrojtjen e interesave të stomatologëve, duke synuar rritjen e transparencës dhe funksionalitetit institucional.
“Këto vendime pasqyrojnë përkushtimin e OSK-së për të qenë një institucion modern, transparent dhe mbështetës ndaj çdo stomatologu në vend. Ne po ndërtojmë baza më të forta ligjore e profesionale për të garantuar standarde më të larta të shërbimeve dhe zhvillim të qëndrueshëm të profesionit,” u tha gjatë mbledhjes nga përfaqësues të Odës./Gazeta Shneta/