Komisioni Qendror i Zgjedhjeve (KQZ) ka përmbyllur procesin e numërimit të të gjitha fletëvotimeve nga zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025.
Zëdhënësi i KQZ-së, Valmir Elezi, ka bërë të ditur se në orët e hershme të mëngjesit të 9 janarit 2026 ka përfunduar edhe numërimi i fletëvotimeve të fundit nga votimi me postë jashtë Kosovës.
Procesi i numërimit në Qendrën e Numërimit dhe Rezultateve (QNR) është mbyllur rreth orës 02:00, duke shënuar përfundimin e plotë të numërimit të votave.
Me përmbylljen e këtij procesi, KQZ ka njoftuar se është e gatshme për shpalljen e rezultateve përfundimtare të zgjedhjeve.
Megjithatë, sipas Ligjit për Zgjedhjet e Përgjithshme, subjektet politike kanë të drejtë të parashtrojnë ankesa në Panelin Zgjedhor për Ankesa dhe Parashtresa (PZAP) brenda afatit prej 48 orësh, në rast të pretendimeve për parregullsi gjatë procesit të numërimit.
Sipas rezultateve të publikuara, Lëvizja Vetëvendosje ka dalë fituese e zgjedhjeve, duke siguruar 57 ulëse në Kuvend me 51.11 për qind të votave, apo gjithsej 486,994 vota.
Partia Demokratike e Kosovës (PDK) është renditur e dyta me 22 ulëse, duke marrë 20.19 për qind të votave, ose 192,407 vota.
Lidhja Demokratike e Kosovës (LDK) ka fituar 15 ulëse me 13.23 për qind të votave, përkatësisht 126,102 vota, ndërsa Aleanca për Ardhmërinë e Kosovës (AAK) ka siguruar 6 ulëse me 5.50 për qind të votave, apo 52,370 vota.
Lista Serbe ka fituar ulëset e garantuara për komunitetin serb, në kuadër të ulëseve të rezervuara për komunitetet joshumicë.
Me këto rezultate, Kuvendi i Kosovës do të përbëhet nga 120 deputetë.
Në zgjedhjet e 28 dhjetorit kanë marrë pjesë rreth 45 për qind e trupit votues.