Instituti Kombëtar i Shëndetësisë Publike (IKSHPK) ka bërë një përditësim mbi situatën e ujit të pijshëm në vend pas vërshimeve të fundit.
Sipas raportit të IKSHPK-së, në rajonin e kryeqytetit cilësia e ujit të pijshëm është brenda standardeve të lejuara, ndërsa uji nuk rekomandohet për pije në Vragoli dhe Miradi të Poshtme.
Ndërkohë, në Han të Elezit, ujësjellësi qendror me burim në Dimcë ka një nivel të lartë turbullire, prandaj uji përdoret vetëm për nevoja teknike dhe nuk është i pijshëm.
Një situatë e ngjashme është edhe në Mbivada, ku për shkak të turbullirës së rritur uji përdoret vetëm për qëllime teknike, ndërsa në Deçan dhe Klinë, për shkak të turbullirës së lartë, uji nuk rekomandohet për pije dhe përdoret vetëm për nevoja teknike.
Gjithashtu, në lokalitetet Hoçë e Madhe, Opterushë, Zaqishtë, Demjan dhe Gërçinë janë evidentuar vlera të rritura të turbullirës, prandaj uji nuk konsiderohet i pijshëm.
Edhe në Malishevë, për shkak të rritjes së turbullirës, uji përdoret vetëm si ujë teknik dhe nuk rekomandohet për pije.
Komunikata e plotë nga IKSHPK-ja
Përditësimi i IKSHPK-së për situatën me ujin e pijshëm në vend:
Situata me ujin e pijshëm – 12 janar 2026
Rajoni i Prishtinës
Në fabrikat për trajtimin e ujit në Shkabaj, Badoc dhe Batllavë. cilësia e ujit të pijshëm është brenda standardeve të lejuara.
Në Drenas/Bivolak, fabrika aktualisht punon me kapacitet të zvogëluar, megjithatë cilësia e ujit mbetet brenda standardeve të lejuara për konsum.
Në Lipjan dhe Kuzmin, cilësia e ujit është brenda standardeve të lejuara.
Në Vragoli dhe Miradi e Poshtme, uji nuk rekomandohet për pije.
Rajoni i Mitrovicës
Mitrovicë, Vushtrri, Skenderaj, si dhe në komunat veriore cilësia e ujit është brenda standardeve të lejuara.
Rajoni i Ferizajt
Në qytetin e Ferizajt, cilësia e ujit është brenda standardeve për ujë të pijshëm.
Në Han të Elezit, ujësjellësi qendror me burim në Dimcë paraqet nivel të lartë turbullire; për këtë arsye, uji përdoret vetëm për nevoja teknike dhe nuk rekomandohet për pije.
Rajoni i Gjilanit
Në qytetin e Gjilanit, uji është brenda standardeve për konsum.
Rezervuarët Prilepnicë dhe Bajë paraqesin parametra fiziko-kimikë brenda standardeve të parapara për ujë të pijshëm.
Në Kamenicë dhe Viti, cilësia e ujit mbetet brenda standardeve të lejuara.
Rajoni i Pejës
Në qytetet Pejë dhe Istog, si dhe në zonën Vrellë/Istog, cilësia e ujit është brenda standardeve për ujë të pijshëm.
Në Mbivada, për shkak të turbullirës së rritur, uji përdoret vetëm për nevoja teknike.
Në Junik, uji është brenda standardeve.
Në Deçan dhe Klinë, për shkak të turbullirës së lartë, uji nuk rekomandohet për pije dhe përdoret vetëm për qëllime teknike.
Rajoni i Gjakovës
Furnizimi me ujë nga rrjeti i KRU Gjakova është i sigurt për konsum.
Në lokalitetet Hoçë e Madhe, Opterushë, Zaqishtë, Demjan dhe Gërçinë janë evidentuar vlera të rritura të turbullirës, prandaj uji nuk konsiderohet i pijshëm.
Rajoni i Prizrenit
Burimi i ujit nga “40 bunarët” në qytetin e Prizrenit brenda standardeve të lejuara për ujë të pijshëm.
Suharekë ende është problem furnizimi në fshatrat e përmbytura si Semetisht, Studençan dhe Nëpërbisht. Pjesa tjetër e furnizimit përmes KRU Hidroregjioni Jugur vijon normalisht.
Në Malishevë, për shkak të rritjes së turbullirës, përdoret vetëm si ujë teknik dhe nuk rekomandohet për pije.
Në Dragash, cilësia e ujit është brenda standardeve të lejuara.