Ankthi vazhdon të mbetet një nga çrregullimet më të keqkuptuara në shoqëri. Dr. Faton Kutllovci, psikiatër dhe drejtor i Klinikës së Psikiatrisë në Qendrën Klinike Universitare të Kosovës (QKUK), ka theksuar se ankthi nuk është “gjë në kokë” dhe as mungesë force, por një gjendje reale që ndikon drejtpërdrejt në trup dhe mendje.
Në një reagim publik, ai sqaron se shumë persona përjetojnë simptoma fizike shqetësuese, si rrahje të shpejta të zemrës, shtrëngim në gjoks, marramendje, lodhje apo vështirësi në frymëmarrje, çka i shtyn të kërkojnë ndihmë mjekësore te specialitete të ndryshme. Sipas tij, këto shenja janë të vërteta dhe nuk duhen nënvlerësuar, përcjell Gazeta Shneta.
Dr. Kutllovci vëren se në rastet kur ekzaminimet mjekësore rezultojnë normale, ndërsa simptomat vazhdojnë, shkaku shpesh lidhet me ankthin, i cili buron nga një gjendje e vazhdueshme alarmi në tru. Ai thekson se trajtimi duhet të jetë i individualizuar dhe se jo çdo rast kërkon përdorim të medikamenteve.
Megjithatë, kur ankthi bëhet i shpeshtë dhe ndërhyn në cilësinë e jetës, trajtimi me ilaçe është pjesë e kujdesit shëndetësor dhe nuk duhet parë si turp. Ai shton se medikamentet ndihmojnë në rikthimin e ekuilibrit neurokimik dhe përdoren për një periudhë të kufizuar kohore.
Në fund, drejtori i Klinikës së Psikiatrisë në QKUK apelon që kërkimi i ndihmës profesionale të shihet si akt force dhe përgjegjësie ndaj vetes.
Postimi i plotë:
ANKTHI TA KUPTOJMË PA STIGMË
Ankthi nuk është dobësi.
Nuk është mungesë force dhe as “gjë në kokë”.
Është frikë nga e ardhmja që shfaqet shpesh dhe prek trupin dhe mendjen njëkohësisht.Shumë njerëz, për shkak të simptomave trupore si rrahje zemre, shtrëngim në gjoks, marramendje, lodhje apo frymëmarrje të vështirë, vizitojnë kardiologun, internistin apo neurologun.
Këto simptoma janë reale, jo të imagjinuara.Kur simptomat vazhdojnë dhe të gjitha ekzaminimet e analizat laboratorike dalin normale, shpesh pas tyre qëndron ankthi.
Jo sepse personi është i dobët, por sepse truri ka mbetur në gjendje alarmi.-Jo çdo ankth ka nevojë për ilaçe.
Por kur ankthi përsëritet dhe nuk të lejon të jetosh i qetë, trajtimi me ilaçe është kujdes shëndetësor, jo turp.– Ilaçet ndihmojnë duke rregulluar neurokiminë e trurit dhe duke i dhënë trupit kohë të qetësohet.
-Trajtimi nuk është përjetë, por për një periudhë të caktuar, derisa ekuilibri të rikthehet.
🩺 Të kërkosh ndihmë është forcë.
Të trajtohesh është kujdes për veten.Dr. Faton Kutllovci, dr sci Psikiatër