Një punonjëse shëndetësore në Indi, e cila ishte infektuar me virusin e rrezikshëm Nipah në muajin dhjetor, ka ndërruar jetë.
Lajmi është konfirmuar nga një zyrtar i lartë shëndetësor në shtetin lindor të Bengalit Perëndimor.
Sipas Reuters, viktima ishte infermiere dhe njëra nga dy personat e infektuar në këtë shtet. Ajo po trajtohej në një spital lokal, por gjendja e saj ishte e rëndë.
Sekretari i Shëndetësisë, Narayan Swaroop Nigam, bëri të ditur se ajo ka vdekur si pasojë e arrestit kardiak.
Virusi Nipah zakonisht transmetohet tek njerëzit nga lakuriqët e natës të infektuar ose nga frutat e kontaminuara prej tyre. Sëmundja mund të shkaktojë temperaturë të lartë dhe inflamacion të trurit, ndërsa shkalla e vdekshmërisë varion nga 40 deri në 75 për qind.
India raporton herë pas here raste të izoluara me këtë virus, ndërsa shteti jugor i Keralës konsiderohet si një nga zonat me rrezik më të lartë në botë për përhapjen e tij.
Pas konfirmimit të rasteve muajin e kaluar, disa vende aziatike, përfshirë Tajlandën, Singaporin dhe Pakistanin, kanë shtuar kontrollet në aeroporte. Megjithatë, Organizata Botërore e Shëndetësisë ka vlerësuar se rreziku i përhapjes ndërkombëtare të virusit mbetet i ulët.
Ndërkohë, edhe në Bangladesh është raportuar një rast fatal në muajin janar, sipas të dhënave të OBSH-së./Gazeta Shneta/