Qendra Klinike Universitare e Kosovës përmes një rregullore të miratuar nga Bordi Drejtues i SHSKUK-së, ka marr vendim që të rris çmimin e për parking brenda hapësirave të këtij institucioni. Me këtë rregullore janë rezervuar edhe dy hapësira për veturat e drejtorave dhe shefave
Sipas rregullores së re, qytetarët janë të obliguar të paguajnë 1 Euro për 1 orë parkim. Çmimi i mëhershëm ka qenë 0.50 Euro për gjysmë ore, 1 Euro për 1 orë dhe nga 0.50 Euro për çdo orë shtesë në vijim.
Rritja e çmimit të parkingut ka shkaktuar reagime të qytetarëve duke u ankuar për kosto të lartë, sidomos për familjarët ose shoqëruesit e pacientëve që janë të shtrirë në spital.
Në këtë rregullore QKUK nuk ka vendosur fare rregull për lëshimin e kuponëve fiskal për pagesat e parkingut. Sipas ud. shefit të Shërbimeve të Përbashkëta Fisnik Dobra, QKUK nuk e ka obligim me lëshua kupona fiskal.
Ai ka thënë se këtë vendim e ka marr vet Administrata Tatimore e Kosovës.
“Sipas një Vendimi të ATK-së ne jemi të liruar nga dhënia e kuponëve fiskal”, ka deklaruar Dobra në një përgjigje me shkrim.
Sa i përket rritjes së çmimit të parkingut, Dobra ka deklaruar se QKUK nuk e ka për obligim me siguru hapësira të parkingut për qytetarët që marrin shërbime shëndetësore në këtë institucion.
“Misioni i QKUK-së është ofrimi i shërbimeve shëndetësore për të gjithë qytetarët e jo sigurimi i parkingjeve. Përcjellësit e pacientëve mund ti sjellin familjarët e tyre në spital dhe jo domosdoshmërisht të rrijnë të parkuar me ditë apo javë të tëra sepse në këtë mënyrë zihen të gjitha parkingjet dhe në këtë mënyrë ua pamundësojnë parkingun qytetarëve të tjerë. Në këtë rast si mund të veprojmë?”, ka deklaruar Dobra.
Ndryshe me këtë rregullore janë rezervuar hapësirat për veturat e drejtorëve dhe shefave në dy hapësira, parkingu A dhe B. Parkingu A është i rezervuar për drejtorin e SHSKUK-së, QKUK-së, si dhe drejtorët e departamenteve. Ndërsa Parkingu B është i rezervuar për anëtarët e Bordit Drejtues, shefat e sektorëve, disa drejtorë të klinikave, etj. /Gazeta Shneta/