Nëse ndiheni më të qetë pas një shëtitjeje në park apo në pyll, kjo nuk është rastësi – është reagim biologjik i trupit.
Qëndrimi në natyrë sjell ndryshime të matshme në organizëm, si ulja e hormoneve të stresit, stabilizimi i presionit të gjakut dhe madje përmirësimi i shëndetit të zorrëve. Lajmi i mirë është se nuk nevojiten orë të tëra: vetëm 20 minuta mjaftojnë për të ndjerë efektet, shkruan BBC.
Një nga ndikimet kryesore është relaksimi i menjëhershëm. Kur shohim gjelbërim, dëgjojmë zogjtë apo ndiejmë aromën e pemëve, sistemi nervor autonom aktivizohet duke ulur ritmin e zemrës dhe tensionin.
Studime të mëdha kanë treguar se njerëzit që kalojnë të paktën 120 minuta në javë në natyrë raportojnë shëndet më të mirë fizik dhe mirëqenie mendore më të lartë, transmeton Gazeta Shneta.
Natyra ndikon edhe në sistemin hormonal. Ajo ul nivelet e kortizolit dhe adrenalinës – hormone që lidhen me stresin dhe ankthin. Në disa raste, është vënë re edhe rritje e qelizave mbrojtëse të trupit, të cilat luftojnë viruset. Edhe qëndrimet e shkurtra në natyrë mund të kenë efekte të qëndrueshme në forcimin e sistemit imunitar.
Aroma e natyrës luan gjithashtu rol të rëndësishëm. Komponimet organike që lëshohen nga bimët mund të thithen nga trupi dhe të ndikojnë drejtpërdrejt në qetësimin e sistemit nervor.
Për shembull, aroma e pishës mund të krijojë ndjesi qetësie brenda pak minutash. Një tjetër përfitim lidhet me mikrobiomën – bakteret e dobishme në trup.
Toka dhe bimët janë të pasura me këto mikroorganizma, të cilët mund të ndihmojnë në përmirësimin e humorit dhe forcimin e imunitetit. Kontakti me natyrën, madje edhe përmes lojës në tokë, mund të ndihmojë në këtë drejtim.
Edhe nëse nuk keni mundësi të dilni shpesh në natyrë, mund të sillni elemente të saj në shtëpi.
Lulet, aromat natyrore apo edhe pamjet e gjelbërta mund të kenë efekte qetësuese. Edhe një foto e një peizazhi natyror mund të ndihmojë në uljen e stresit. /Gazeta Shneta/