Policia e Kosovës i ka arrestuar dy kirurgë në Spitalin e Vushtrrisë nën dyshimin për marrje të ryshfetit.
Gazeta Shneta ka mësuar nga burime brenda Spitalit, se kirurgët e arrestuar janë Ekrem Sefiu dhe Valdet Rexhepi.
Prokuroria Themelore në Mitrovicë në një njoftim për media ka bërë të ditur se Sefiu është i dyshuar për marrje të ryshfetit në tre raste, kurse Rexhepi në pesë raste.
“Sipas dyshimeve fillestare, i dyshuari E.S. në tri raste, ndërsa i dyshuari V.R. në pesë raste, kanë kërkuar dhe pranuar para nga qytetarët për ofrimin e shërbimeve shëndetësore”, thuhet në njoftim.
Kjo është hera e dytë që arrestohen këta dy kirurg për veprën e njëjtë. Rexhepi ishte arrestuar në vitin 2016 dhe ishte dënuar nga gjykata me gjobë prej 2400 Euro. Kurse Sefiu është arrestuar në vitin 2023 dhe ndaj tij është ngritur aktakuza e cila është ende në proces.
Me vendim të prokurorit, të dyshuarve u është caktuar masa e ndalimit prej 48-orësh, ndërsa brenda afatit ligjor do të paraqitet kërkesa për caktimin e masës së sigurisë për të ndaluarit.
“Prokuroria Themelore në Mitrovicë mbetet e përkushtuar në luftimin e korrupsionit, keqpërdorimit të detyrës zyrtare dhe çdo formë tjetër të kriminalitetit që cenon sundimin e ligjit, sigurinë publike dhe besimin e qytetarëve në institucionet publike”, thuhet në njoftim. /Gazeta Shneta/