Një analizë e BBC-së tregon se rreth 25% e foshnjave në Angli lindin tashmë përmes operacionit emergjent cezarian, një rritje e ndjeshme krahasuar me pesë vite më parë. Gjatë kësaj periudhe, përqindja e këtyre lindjeve është rritur nga 18% në 26%, ndërsa lindjet vaginale pa përdorimin e instrumenteve kanë rënë nga 53% në 43%.
Ekspertët e konsiderojnë këtë një ndryshim të madh në mënyrën se si gratë po lindin në Angli. Sipas tyre, një rritje kaq e shpejtë nuk është vërejtur në shumicën e vendeve të tjera evropiane, transmeton Gazeta Shneta.
Megjithëse nuk ka të dhëna të plota për arsyet e këtij trendi, specialistët përmendin disa faktorë të mundshëm. Midis tyre janë rritja e moshës së nënave, obeziteti, sëmundjet kronike para shtatzënisë, si dhe ndikimi i skandaleve të profilit të lartë në repartet e maternitetit, ku janë raportuar raste tragjike të vonesave në kryerjen e operacioneve cezariane.
Disa ekspertë mendojnë se frika nga komplikacionet dhe paditë ligjore mund të ketë ndikuar në vendimet klinike, duke bërë që personeli mjekësor të zgjedhë më shpesh ndërhyrjen kirurgjikale. Në pesë vitet e fundit është regjistruar edhe një rritje e kërkesave ligjore kundër sistemit shëndetësor për probleme gjatë lindjes.
Megjithatë, rritja e numrit të operacioneve nuk është shoqëruar me ulje të ndjeshme të lindjeve të vdekura apo vdekjeve neonatale, gjë që ka ngritur pyetje mbi përfitimet reale të këtij trendi.
Specialistët paralajmërojnë se operacionet cezariane emergjente janë ndërhyrje të mëdha kirurgjikale, të cilat kërkojnë kohë rikuperimi dhe mund të shoqërohen me pasoja fizike dhe emocionale për nënën. Ata theksojnë nevojën për më shumë studime dhe të dhëna të sakta për të kuptuar arsyet e kësaj rritjeje dhe për të garantuar sigurinë e nënave dhe foshnjave. /Gazeta Shneta/