Personat që praktikojnë rregullisht ushtrime të forcës gjatë moshës së mesme mund të ulin ndjeshëm rrezikun për zhvillimin e diabetit të tipit 2, sugjeron një studim i ri i publikuar në revistën shkencore “JAMA Network Open”.
Hulumtimi përfshiu më shumë se 143 mijë të rritur në Shtetet e Bashkuara, të cilët u ndoqën për një periudhë deri në 19 vjet.
Rezultatet treguan se personat që kryenin të paktën dy orë ushtrime të forcës në javë kishin 27 për qind më pak gjasa të zhvillonin diabet të tipit 2 krahasuar me ata që nuk angazhoheshin në këtë lloj aktiviteti fizik.
Përfitimet më të mëdha u vunë re tek ata që e ruajtën këtë rutinë gjatë gjithë moshës së mesme.
+Sipas studiuesve, ky grup kishte 42 për qind rrezik më të ulët për diabetin e tipit 2.
Ekspertët theksojnë se ushtrimet e forcës, si ngritja e peshave apo aktivitetet që forcojnë muskujt, luajnë rol të rëndësishëm në kontrollin e nivelit të sheqerit në gjak dhe në parandalimin e çrregullimeve metabolike.
Studimi zbuloi gjithashtu se rreziku më i ulët për diabet u regjistrua tek personat që kombinonin ushtrimet e forcës me aktivitet aerobik të rregullt dhe reduktonin kohën e kaluar ulur, përfshirë shikimin e televizorit për periudha të gjata.
Endokrinologia Shirin Jaggi, e cila shqyrtoi rezultatet e studimit, tha se gjetjet konfirmojnë rëndësinë e aktivitetit fizik në parandalimin e diabetit, por njëkohësisht nxjerrin në pah rolin e veçantë të ushtrimeve të forcës.
Sipas saj, më e rëndësishme se kohëzgjatja e ushtrimeve është vazhdimësia dhe konsistenca afatgjatë në kryerjen e tyre.
Autorët e studimit rekomandojnë që ushtrimet e forcës të përfshihen më gjerësisht në strategjitë dhe udhëzimet për parandalimin e diabetit të tipit 2.