Shpërthimi i hantavirusit, i cili tërhoqi vëmendjen ndërkombëtare muajin e kaluar, pritet të përfundojë zyrtarisht më 2 korrik, ka njoftuar Organizata Botërore e Shëndetësisë (OBSH).
Gjatë një konference për media në Gjenevë, drejtori i përgjithshëm i OBSH-së, Tedros Adhanom Ghebreyesus, tha se numri i rasteve të konfirmuara mbetet 13, përfshirë tre viktima, raporton Euronews transmeton Gazeta Shneta.
Që nga raportimi i shpërthimit më 2 maj, janë identifikuar mbi 650 kontakte në 33 vende dhe territore. Sipas OBSH-së, shumica e tyre e kanë përfunduar periudhën e karantinës, ndërsa 54 persona të mbetur pritet ta përfundojnë atë deri më 2 korrik.
Nëse deri atëherë nuk raportohen raste të reja, organizata do ta konsiderojë shpërthimin të mbyllur.
Rasti shkaktoi shqetësim global pasi disa pasagjerë të anijes turistike MV Hondius, me flamur holandez, shfaqën simptoma të rënda të sëmundjes gjatë një udhëtimi në Atlantikun Jugor. Anija ishte nisur nga Ushuaia e Argjentinës më 1 prill dhe kishte ndaluar në disa ishuj të rajonit.
Vdekja e parë u regjistrua më 11 prill, ndërsa dy viktima të tjera humbën jetën më 26 prill dhe 2 maj. Pasagjerët e mbetur u evakuuan më vonë në Tenerife.
OBSH-ja ka bërë të ditur se do të vazhdojë bashkëpunimin me autoritetet lokale për të hetuar burimin dhe përhapjen e virusit. Po ashtu, po punohet për dërgimin e një mostre të virusit në qendrën BioHub në Zvicër, gjë që mund të ndihmojë në zhvillimin e testeve diagnostikuese, trajtimeve dhe vaksinave për shpërthime të ardhshme.
Hantaviruset transmetohen kryesisht nga brejtësit dhe mund të shkaktojnë sëmundje të rënda, madje edhe fatale te njerëzit. Ndërkohë, autoritetet shëndetësore amerikane konfirmuan se asnjë rast i sëmundjes nuk u regjistrua në Shtetet e Bashkuara si pasojë e këtij shpërthimi. /Gazeta Shneta/