Barnat për trajtimin e obezitetit po përdoren gjithnjë e më shumë në mbarë botën, por një studim i ri sugjeron se përfitimet e tyre mund të mos shkojnë shumë përtej humbjes së kilogramëve. Sipas hulumtimit të publikuar në revistën “The BMJ”, shumica e këtyre barnave nuk sjellin përmirësime domethënëse në cilësinë e jetës pas një viti përdorimi.
Miliona njerëz kanë përdorur gjatë vitit të fundit barna si Ozempic dhe Mounjaro për të humbur peshë. Studiuesit analizuan 262 prova klinike që përfshinë rreth 100 mijë pjesëmarrës dhe 19 barna të ndryshme për trajtimin e mbipeshës dhe obezitetit.
Rezultatet treguan se sa më e madhe të ishte humbja e peshës, aq më të shpeshta ishin efektet anësore dhe ndërprerja e trajtimit.
“Shumica e substancave aktive nuk e përmirësojnë në mënyrë domethënëse cilësinë e jetës dhe vetëm disa prej tyre tregojnë përfitime për shëndetin kardiovaskular”, shkruajnë autorët e studimit.
Gjatë provave klinike, pjesëmarrësit plotësuan pyetësorë standardë për vlerësimin e cilësisë së jetës së lidhur me shëndetin. Studiuesit krahasuan rezultatet e personave që përdorën barna me ata që ndoqën vetëm ndryshime në stilin e jetesës dhe zbuluan se, në përgjithësi, nuk kishte përmirësime me rëndësi klinike në cilësinë e jetës.
Nga të gjitha trajtimet e analizuara, tirzepatidi – përbërësi aktiv i barnave Mounjaro dhe Zepbound – si dhe CagriSema, një ilaç që ende nuk është miratuar për përdorim klinik, arritën humbjen më të madhe të peshës trupore.
Ndërkohë, semaglutidi nënlëkuror, i përdorur në Ozempic dhe Wegovy, ka aktualisht provat më të forta për uljen e rrezikut të vdekjes dhe të ngjarjeve të mëdha kardiovaskulare.
Megjithatë, si tirzepatidi ashtu edhe semaglutidi u shoqëruan me një ulje të masës së dobët trupore, pra peshës së trupit pa përfshirë yndyrën. Masa e ulët muskulore lidhet me një rrezik më të lartë për rrëzime, fraktura të kockave dhe vdekje të parakohshme.
Autorët theksojnë se shumica e studimeve të analizuara kishin periudha të shkurtra ndjekjeje dhe se nevojiten kërkime afatgjata për të kuptuar më mirë efektet e barnave më të reja.
Ekspertë që nuk morën pjesë në studim paralajmërojnë se rezultatet mbi cilësinë e jetës duhet të interpretohen me kujdes, pasi kjo matet në mënyra të ndryshme dhe përvoja e secilit pacient mund të jetë e ndryshme.
Sipas autorëve, obeziteti duhet të trajtohet si një sëmundje kronike komplekse dhe suksesi i trajtimit nuk duhet të matet vetëm me kilogramët e humbur. Edhe José M. Ordovás nga Universiteti Tufts theksoi se humbja e peshës nuk nënkupton automatikisht përmirësim të çdo aspekti të shëndetit.
“Peshorja tregon vetëm një pjesë të historisë. Suksesi në trajtimin e obezitetit duhet të matet edhe me përmirësimin e shëndetit, funksionimit të organizmit dhe cilësisë së jetës”, përfundoi ai. /Gazeta Shneta/