Gratë shtatzëna që ndërpresin përdorimin e antidepresivëve të përshkruar nga mjeku mund të përballen me një rrezik pothuajse dy herë më të lartë për probleme serioze të shëndetit mendor, krahasuar me ato që vazhdojnë terapinë, sipas një studimi të ri.
“Ky studim thekson nevojën që shëndeti mendor i grave shtatzëna të merret seriozisht dhe të ofrohen të gjitha opsionet e trajtimit, përfshirë barnat kur ato janë të përshtatshme klinikisht”, tha autorja kryesore e studimit, Dr. Kelly Zafman nga Spitali i Universitetit të Pensilvanisë.
Çrregullimet e shëndetit mendor janë ndër faktorët kryesorë që kontribuojnë në vdekjet e nënave në SHBA. Shtatzënia mund të përkeqësojë depresionin, ankthin dhe probleme të tjera psikiatrike që një grua mund t’i ketë para shtatzënisë, shkruan burimi Health Day transmeton Gazeta Shneta.
Studiuesit theksuan se antidepresivët e grupit frenues selektivë të rimarrjes së serotoninës (SSRI) konsiderohen të sigurt për përdorim gjatë shtatzënisë. Të dhënat shkencore tregojnë se këto barna nuk lidhen me rritje të rrezikut për defekte të lindjes apo probleme zhvillimore tek fëmijët.
Megjithatë, disa gra i ndërpresin barnat gjatë shtatzënisë nga frika e efekteve të mundshme te fetusi.
Në studimin e ri, studiuesit analizuan të dhënat shëndetësore të sigurimeve për rreth 4 mijë gra që lindën gjatë viteve 2023 dhe 2024. Të gjitha kishin diagnozë të depresionit ose ankthit para shtatzënisë.
Rreth 37% e grave kishin hyrë në shtatzëni me një recetë për antidepresivë. Nga këto, rreth 18% nuk kishin marrë asnjë recetë gjatë shtatzënisë, ndërsa 65% kishin pasur një ndërprerje prej më shumë se 60 ditësh në marrjen e barnave.
Rezultatet treguan se gratë që ndërprenë trajtimin kishin pothuajse dyfish rrezik për një krizë të shëndetit mendor. Rreziku ishte më i lartë gjatë muajit të parë dhe muajit të nëntë të shtatzënisë.
Ekspertët theksojnë se vendimi për vazhdimin ose ndërprerjen e antidepresivëve gjatë shtatzënisë duhet të merret gjithmonë në bashkëpunim me mjekun, duke vlerësuar përfitimet dhe rreziqet për nënën dhe foshnjën. /Gazeta Shneta/