Konsumimi i një avokadoje në ditë mund të ndihmojë në uljen e niveleve të kolesterolit LDL (“kolesterolit të keq”) te të rriturit me obezitet abdominal, sipas një studimi të ri. Studiuesit sugjerojnë se reduktimi i grimcave LDL në gjak mund të lidhet me një ulje prej rreth 4% të rrezikut për sëmundje të zemrës.
Kolesteroli LDL është një faktor i njohur rreziku për sëmundjet kardiovaskulare. Në qarkullimin e gjakut, ai transportohet përmes grimcave LDL, të përbëra nga yndyra dhe proteina. Jo të gjithë njerëzit me të njëjtin nivel të kolesterolit LDL kanë të njëjtin rrezik, pasi disa mund të kenë një numër më të madh të grimcave të vogla dhe të dendura LDL, të cilat depërtojnë më lehtë në muret e arterieve dhe kontribuojnë në formimin e pllakave aterosklerotike, shkruan burimi Medical News Today transmeton Gazeta Shneta.
Studimi, i publikuar në revistën “Journal of Clinical Lipidology”, analizoi të dhënat nga 786 të rritur mbi moshën 25-vjeçare me obezitet abdominal. Burrat pjesëmarrës kishin perimetër të belit mbi 101 centimetra, ndërsa gratë mbi 89 centimetra.
Pjesëmarrësit u ndanë në dy grupe. Njëri grup vazhdoi dietën dhe stilin e zakonshëm të jetesës, ndërsa grupi tjetër shtoi një avokado çdo ditë për gjashtë muaj, pa bërë ndryshime të tjera në ushqyerje ose aktivitet fizik.
Rezultatet treguan se konsumimi i përditshëm i avokados nuk ndikoi në peshën trupore ose perimetrin e belit, por uli përqendrimin e grimcave LDL. Personat që konsumuan një avokado në ditë patën një ulje mesatare prej 49 nanomolësh për litër të grimcave LDL krahasuar me grupin tjetër.
Sipas studiuesve, efekti mund të lidhet me përbërësit ushqyes të avokados, përfshirë yndyrnat mono të pangopura, fibrat dietike dhe fitosterolet. Një avokado përmban rreth 9 gramë fibra dhe përbërës natyralë që mund të ndikojnë në përmirësimin e profilit të kolesterolit.
Ekspertët theksojnë se yndyrnat e shëndetshme në avokado mund të zëvendësojnë yndyrnat e ngopura, si ato që gjenden në gjalpë, duke ndihmuar në uljen e prodhimit të grimcave të vogla LDL që lidhen më shumë me krijimin e pllakave në arterie.
Përveç ndikimit në kolesterol, avokado mund të ndihmojë edhe në reduktimin e inflamacionit dhe stresit oksidativ, përmirësimin e presionit të gjakut dhe rritjen e cilësisë së përgjithshme të dietës.
Sipas autorëve të studimit, përfshirja e avokados në dietën e përditshme mund të jetë një ndryshim i vogël, por i realizueshëm, që ndihmon në përmirësimin e shëndetit kardiovaskular. /Gazeta Shneta/