Zhdukja e 300 mijë eurove nga AKPM është skandali i dytë, pas vjedhjes së barnave para disa vitesh. Për këtë të fundit ishte ngritur aktakuzë ndaj kryeshefit Jeton Shala, i cili vazhdon të mbajë këtë pozitë
Brenda dy vitesh Agjencia Kosovare për Produkte dhe Pajisje Medicinale është përballë me dy superskandale. Në prill të vitit 2016, Prokuroria Themelore në Prishtinë kishte ngritur aktakuzë ndaj kryeshefit të kësaj agjencie Jeton Shala, për keqpërdorim të pozitës zyrtare.
Gazeta Zëri ka raportuar në atë kohë se Shala ishte njëri nga të dyshuarit për vjedhjen e ilaçeve në agjencinë të cilën e drejton që nga viti 2015.
Vjedhja e ilaçeve kishte ndodhur në vitin 2011 në dhomën e dëshmive në AKPM, kur Shala ishte ushtrues detyre i kryeshefit në këtë institucion.
Por çuditërisht, Prokuroria ishte tërhequr nga kjo aktakuzë vetëm pak javë më vonë. Prokurori i rastit, Feti Tunuzliu kishte deklaruar për Koha Ditore se i akuzuari, në këtë rast Jeton Shala, ka ofruar disa dokumente shtesë përmes të cilave kishte dëshmuar se akuza nuk qëndron.
E ky nuk është i vetmi skandal i agjencisë e cila udhëhiqet akoma nga Shala. Zyrtarë të kësaj agjencie po dyshohet se kanë keqpërdorur mbi 300 mijë euro nga buxheti i Ministrisë së Shëndetësisë.
Për këto dyshime tanimë Policia e Kosovës ka arrestuar Mendim Sojevën, shef i divizionit të financave dhe buxhetit në AKPM. Ndërsa Sejdë Tolaj, drejtor i Administratës, është dërguar në Komision Disiplinor.
Sipas burimeve të Gazetës Shneta, dyshimet lidhen edhe me zyrtarë të tjerë që mbajnë pozita të larta në dy institucionet.
Keqpërdorimet lidhen me dyshimet se këta dy zyrtarë, si dhe Fatmir Kajtazi zyrtar financiar në MSH, kanë bërë tërheqjen e 400 mijë eurove në emër të avanseve për udhëtime zyrtare. Paratë ishin tërhequr nga 3 mijë deri në 20 mijë euro, të cilat nuk janë arsyetuar.
Ndonëse Shala ka qenë i akuzuar dhe tani po përballet me dyshime për korrupsion të vartësve të tij, ai ende vazhdon të mbajë pozitën e kryeshefit të Agjencisë.
Gazeta Shneta ka tentuar të kontaktojë me Shalën për të marrë një përgjigje nëse ai do të jap dorëheqje pas këtij skandali, por ai nuk ka qenë i qasshëm në telefon. /Gazeta Shneta/