Një aksident tragjik trafiku ka ndodhur mëngjesin e sotëm rreth orës 09:35, në rrugën “Adrian Krasniqi” në Pejë, ku ka humbur jetën një 85-vjeçar me aftësi të kufizuara.
Sipas hetimeve fillestare, në aksident është përfshirë një kamion “Volvo” me mjet të bashkangjitur (vinç), i drejtuar nga J.A, dhe një karrocë për persona me aftësi të kufizuara, e drejtuar nga viktima Sh.B, 85-vjeçar.
Policia dyshon se drejtuesi i kamionit, duke mos e mbajtur krahun e djathtë të lëvizjes dhe pa i kushtuar vëmendje pjesëmarrësve të tjerë në komunikacion, ka goditur viktimën, ku rrota e mjetit të bashkangjitur ka kaluar mbi kokën e tij, raporton Sinjali.
Viktima po lëvizte nga drejtimi i kundërt dhe ishte prapësuar për shkak të goditjes së cepit të trotuarit, moment kur ndodhi aksidenti fatal.
Në vendin e ngjarjes kanë dalë njësitë e policisë, hetuesit e Njësisë për Trafikun Rrugor dhe mjeku kujdestar, i cili ka konstatuar vdekjen e viktimës.
Me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore për obduksion, ndërsa drejtuesi i kamionit është ndaluar për 48 orë.