Qendra për Informim dhe Përmirësim Social (QIPS), janë mbledhur sot përpara hyrjes së repartit të Logopedisë në ShSKUK për të vazhduar me thirrjet për shkarkimin e Iljasa Fazliut.
Nëpërmjet këtij aksioni, aktivistët e shpallën hapësirën e repartit të Logopedisë si rrezik për fëmijët përderisa abuzuesit e tillë nuk largohen, përcjell Gazeta Shneta.
Sidoqoftë, ky aksion si duket nuk i pëlqeu Iljasa Fazliut i cili para hyrjes dhe përgjatë fjalosjes me aktivistët/et ai e hoqi thirrjen e QIPS nga hyrja e repartit.
QIPS i ka rikujtuar z. Fazliut se ShSKUK duhet të punojë për të mirën e pacienteve dhe jo për interesat e një abuzuesi.
Mes tjerash, QIPS ka njoftuar se ankesa e tyre drejtuar drejtorisë së ShSKUK-së nuk ka marrë përgjigjie, sidoqoftë ata do të vazhdojnë të kërkojnë dorëheqjen e Iljasa Fazliut dhe komisionit përgjegjës për rikthimin e tij në punë.
QIPS ka ftuar logopedët dhe stafi mjekësor të bashkëngjiten në këtë thirrje për të kërkuar drejtësi dhe hapësirë të sigurt për të gjithë fëmijët dhe për të ruajtur dinjitetin e punës së tyre i cili njolloset çdo ditë që lejohet të vazhdojë punën një abuzues në të njëjtën hapësirë me ta.
Kujtojmë se në një klinikë private në Gjilan, doktori Iljasa Fazliu, defektolog i Logopedisë, është dyshuar për trajtim të pandërgjegjshëm, ndaj një fëmije me autizëm.
Logopedi Fazliu i cili ishte arrestuar si i dyshuar për trajtim të pandërgjegjshëm mjekësor, është rikthyer në punë si logoped në Klinikën e ORL-së në Qendrën Klinike Universitare të Kosovës. /Gazeta Shneta /