Aktivisti i Lëvizjes Vetëvendosje dhe ish-drejtori i Inspeksionit në Komunën e Prizrenit në kohën sa ka udhëhequr kjo parti, Edon Muçaj, është punësuar si inspektor farmaceutik në Ministrinë e Shëndetësisë. Muçaj ka mohuar të ketë ndikuar partia për punësimin e tij.
Edon Muçaj, aktivist i Lëvizjes Vetëvendosje, është punësuar si inspektor farmaceutik në Ministrinë e Shëndetësisë, shkruan Gazeta Shneta.
Muçaj farmacist me profesion, ka qenë kandidat për asamblist në zgjedhjet e fundit komunale në Komunën e Prizrenit në vitin 2021. Ndërkaq para këtyre zgjedhjeve në kohën kur LVV ka udhëhequr me Prizrenin, Muçaj ka mbajtur pozitën e drejtorit të Inspeksionit të komunës.
Gazeta ka kontaktuar me Muçajn për punësimin e tij. Ai ka mohuar se partia ka ndikuar që të pranohet në këtë konkurs.
“Mendoj që nëse Lëvizja do të dëshironte të më ndihmonte do të kishte bërë më herët dhe nuk do isha duke udhëtuar me dhjetra kilometra çdo ditë për të punuar për të mbajtur familjen! Andaj përgjigjja ime konkrete është që jo madje as që e kanë ditur dikush nga ta që kam aplikuar”, ka deklaruar ai për Gazetën Shneta.
Gazeta ditë më parë ka raportuar edhe për një ish-kandidat për asamble në komunën e Vushtrrisë nga radhët e LVV-së, i cili u punësua si inspektor shëndetësor. Bëhet fjalë për fizioterapeutin Kadri Maxhuni.
Ai e ka pranuar se ka qenë pjesë e Lëvizjes Vetëvendosje dhe kandidat për asamble, por ka mohuar se angazhimi i tij politik ka ndikuar që të pranohet në punë.
“Çka është me rëndësi kjo. Çfarë ndikimi. Unë e kam përvojën dhe jam magjistër. Çka ka me ndiku. I kam plotësu të gjitha kriteret dhe kam përvojë mbi 20 vjet pune. Kam përvojë në menaxhim dhe kam ordinancën time”, ka deklaruar Maxhuni.
Në Ministrinë e Shëndetësisë së fundmi janë pranuar 24 inspektorë shëndetësorë dhe 11 inspektorë farmaceutik. /Gazeta Shneta/
Ish-kandidati i LVV-së për asamblist punësohet inspektor në Ministrinë e Shëndetësisë