Shuarja e familjes Sadikaj nga Suhareka ditë më parë në një aksident në Duhël, ka shokuar opinionin kosovar. Por numri i vdekjeve në aksidente për këtë vit është alarmant.
Në 6 muajt e parë të këtij viti kanë humbur jetën 60 persona, ndërsa shumë të tjerë kanë pësuar lëndime të rënda e të lehta.
Policia e Kosovës ka pohuar se me qëllim të ngritjes së sigurisë në trafikun rrugor, ngritjes së vëmendjes për një kujdes më të shtuar për të gjithë pjesëmarrësit në trafik në vazhdimësi ndërmerr veprime policore, të cilat kontribuojnë në ngritjen e nivelit të sigurisë në trafik, shkruan Gazeta Zëri.
Sipas Policisë, gjatë këtij gjashtëmujori është evidentuar rënie e aksidenteve fatale për 19,61% dhe rënie në total të aksidenteve prej 13,25%, shqetësuese ende mbetet humbja e vetëm edhe një jete në trafik.
Policia e Kosovës bën thirrje te të gjithë pjesëmarrësit në trafik e në veçanti te drejtuesit e automjeteve që të jenë të kujdesshëm dhe sa më vigjilentë gjatë drejtimit të automjeteve të tyre, duke respektuar në tërësi të gjitha rregullat dhe dispozitat ligjore.