Agjencia e Menaxhimit Emergjent (AME), në kuadër të Ministrisë së Punëve të Brendshme, gjatë konferencës vjetore për media ka prezantuar aktivitetet, arritjet dhe sfidat për vitin 2025, duke theksuar rritjen e ndjeshme të numrit të intervenimeve, veçanërisht në rastet e zjarreve.
Drejtori i Agjencisë për Menaxhimin e Emergjencave, Genc Metaj, tha se njësitë profesionale të zjarrfikjes dhe shpëtimit gjatë vitit 2025 kanë realizuar gjithsej 15 mijë e 137 intervenime, prej të cilave 11 mijë e 466 kanë qenë intervenime në zjarre.
Sipas tij, periudha më e ndjeshme e vitit ka qenë gjatë muajve korrik, gusht dhe shtator, kur janë regjistruar 7 mijë e 91 intervenime në zjarre. Metaj bëri të ditur se gjatë vitit janë realizuar edhe 320 intervenime në raste vërshimesh, 272 intervenime në aksidente, si dhe 2 mijë e 983 intervenime dhe shërbime të ndryshme.
Duke folur për shpërndarjen rajonale të zjarreve, Metaj tha se rajoni i Prishtinës ka qenë më i prekuri me 3 mijë e 669 zjarre, pasuar nga Mitrovica me 2 mijë e 34, Gjilani me 1 mijë e 629, Ferizaj me 1 mijë e 299, Gjakova me 1 mijë e 59, Prizreni me 984 dhe Peja me 792 zjarre.
Ai shtoi se krahasuar me vitin 2024, gjatë vitit 2025 është shënuar rritje e numrit të intervenimeve dhe zjarreve, me afërsisht 2 mijë intervenime dhe rreth 1 mijë zjarre më shumë.
“Numri i intervenimeve, njësitë profesionale të zjarrfikësve dhe shpëtimit kanë realizuar gjatë vitit 2025 gjithsej 15 mijë e 137 intervenime. Nga to, 11 mijë e 466 kanë qenë intervenime në zjarre. Periudha më e ndjeshme e këtij viti ka qenë në muajt korrik, gusht dhe shtator, ku kanë qenë 7 mijë e 91 intervenime në zjarre. Kemi pasur 320 intervenime në raste vërshimesh, 272 intervenime në aksidente, 2 mijë e 983 intervenime dhe shërbime të ndryshme. Sa i përket zjarreve, i kemi ndarë edhe në numër sipas regjioneve. Prishtina është regjioni më i prekur nga zjarret, numri i zjarreve ka qenë 3 mijë e 669 zjarre, pason e dyta Mitrovica me 2 mijë e 234 zjarre, Gjilani 1 mijë e 629, Ferizaj 1 mijë e 299, Gjakova me 1 mijë e 59, Prizreni me 984 dhe Peja me 792 zjarre. Nëse e krahasojmë vitin 2024 me vitin 2025, kemi një rritje të numrit të intervenimeve dhe numrit të zjarreve, afërsisht 2 mijë intervenime dhe afër 1 mijë zjarre gjatë vitit 2025”, tha ai.
Metaj theksoi se gjatë vitit janë realizuar edhe një sërë aktivitetesh strategjike, duke përfshirë miratimin e programit të ushtrimeve dhe vlerësimin e gatishmërisë kombëtare, hartimin e pesë kornizave kombëtare në fushën e parandalimit, mbrojtjes, zbutjes, reagimit dhe rimëkëmbjes, si dhe dokumentin për vlerësimin e rrezikut nga fatkeqësitë natyrore dhe fatkeqësitë e tjera.
Po ashtu, sipas tij, janë hartuar 15 funksione mbështetëse sipas Planit Kombëtar të Reagimit, plani i performancës dhe është zbatuar plani i veprimit i Strategjisë Shtetërore për zvogëlimin e rrezikut nga fatkeqësitë natyrore dhe fatkeqësitë e tjera.
“Gjatë këtij viti kemi realizuar një sërë aktivitetesh. Pikat kryesore të aktiviteteve, sa i përket dokumentacionit për rritjen e gatishmërisë kombëtare ndaj fatkeqësive natyrore, janë realizuar këto: miratimi i programit të ushtrimeve dhe vlerësimi i gatishmërisë kombëtare, hartimi i pesë kornizave kombëtare në fushën e parandalimit, mbrojtjes, zbutjes, reagimit dhe rimëkëmbjes. Hartimi i dokumentit të vlerësimit të rrezikut nga fatkeqësitë natyrore dhe fatkeqësitë tjera, hartimi i 15 funksioneve mbështetëse sipas planit të reagimit kombëtar. Hartimi i planit të performancës, zbatimi i planit të veprimit të strategjisë shtetërore për zvogëlimin e rrezikut nga fatkeqësitë natyrore dhe fatkeqësitë tjera”, tha ai.