Autoritetet shëndetësore në Angli kanë njoftuar plane për ndalimin e shitjes së pijeve energjike për fëmijët dhe të rinjtë nën moshën 16 vjeç, si pjesë e përpjekjeve për të reduktuar ndikimin e konsumit të lartë të kafeinës dhe sheqerit te kjo grupmoshë.
Sipas raportimit të BBC News, masat synojnë të mbrojnë shëndetin e fëmijëve, pasi pijet energjike përmbajnë shpesh nivele të larta të kafeinës, një substancë stimuluese që mund të ndikojë në sistemin nervor, veçanërisht te organizmat në zhvillim, transmeton Gazeta Shneta.
Ekspertët paralajmërojnë se konsumimi i shpeshtë i këtyre pijeve mund të lidhet me probleme të gjumit, rritje të ankthit, nervozizëm, vështirësi në përqendrim dhe ndikime negative në shëndetin mendor të të rinjve. Për shkak të përmbajtjes së lartë të sheqerit, ato gjithashtu mund të kontribuojnë në rritjen e rrezikut për mbipeshë, probleme dentare dhe çrregullime metabolike.
Mjekët theksojnë se fëmijët dhe adoleshentët janë më të ndjeshëm ndaj efekteve të kafeinës sesa të rriturit. Konsumimi i sasive të mëdha mund të shkaktojë rrahje të shpejta të zemrës, shqetësim, dhimbje koke dhe rritje të përkohshme të presionit të gjakut.
Qeveria britanike ka argumentuar se kufizimi i shitjes është një masë parandaluese për të ulur ekspozimin e fëmijëve ndaj këtyre produkteve, të cilat shpesh reklamohen si burim energjie dhe përmirësim i performancës, pavarësisht shqetësimeve shëndetësore.
AEkspertët e ushqyerjes mbështesin edukimin e të rinjve për zgjedhjet e shëndetshme dhe rekomandojnë që fëmijët të marrin energjinë e nevojshme përmes gjumit të mjaftueshëm, ushqimit të balancuar dhe aktivitetit fizik, në vend të pijeve me përmbajtje të lartë stimuluesish. /Gazeta Shneta/