Ministria e Shëndetësisë njoftoi se dje janë vjedhur medikamente, karrike e gjësende të tjera në Depon Qendrore të Barnave.
Në njoftim u tha që me datën 07.11.2022, Depon Qendrore të Barnave është vërejtur mungesa e disa karrikeve dhe menjëherë kishte filluar verifikimi i produkteve të barnave, ku është vërejtur mungesa e disa llojeve të tyre.
Menjëherë është njoftuar Policia e Kosovës. Kjo e fundit ka arritur të arrestojë një të dyshuar deri më tani për këtë rast.
“Lidhur me rastin e vjedhjes së rëndë në një depo në Rr. ‘Driton Hoxha’, ju njoftojmë se me urdhër të Prokurorit të Shtetit është ndaluar një person i dyshuar në kohëzgjatje prej 48 orësh, për shkak të veprës penale ‘Vjedhja e rende’”, ka konfirmuar për Klankosova Prokuroria Themelore e Kosovës.Po ashtu është thënë se për të dyshuarin është paraqitur kërkesa për caktimin e masës së paraburgimit.
Ndërkaq, në njoftimin e MSH-së të ditës së djeshme, u tha se gjatë verifikimit në depo, ku është vërejtur mungesë e një sasie të Methadonit sirup, sasi prej 90 copë, ndërsa pas njoftimit të Policisë, dhe në prezencë të tyre, është vërejtur mungesë e sasisë edhe nga produkti Tramadol ampula dhe Morfin ampula.“Në bashkëpunim me Policinë e Kosovës është kontrolluar hapësira e Depos Qendrore të Barnave dhe në fund të Depos është vërejtur se është bërë thyerje e murit nga podrumet e Pallatit të ‘Rilindjes’, ku sigurimi fizik i depos nuk ka qasje”, njoftoi dje MSH-ja.