Zyra Kombëtare e Auditorit me kërkesë të Fondit të Sigurimeve Shëndetësore përmes Ministrisë së Financave, ka audituar mospërputhshmëritë e detyrimeve financiare ku është konfirmuar borxhi prej afër 32 milionë Euro, prej të cilave afër 29 mln janë detyrime kontingjente. ZKA ka gjetur plot parregullsi në Programin për Trajtimin e Pacientëve Jashtë Institucioneve Publike
Borxhe milionëshe dhe parregullësi të shumta janë evidentuar nga Zyra Kombëtare e Auditimit në Fondin e Sigurimeve Shëndetësore dhe Programin për Trajtimin e Pacientëve Jashtë Institucioneve Publike, shkruan Gazeta Shneta.
Këto gjetje janë pasqyruar në një raport të auditimit i cili është kryer me kërkesë të vet FSSH-së vitin e kaluar, përmes Ministrisë së Financave për shkak të mospërputhshmërisë së detyrimeve financiare.
“FSSH në pasqyrat financiare të vitit 2022 ka shpalosur detyrime totale në vlerë prej 31,838,863€ nga të cilat 2,855,510€ ishin detyrime financiare, ndërsa 28,983,353€ prej tyre ishin detyrime kontigjente. Në vlerën e detyrimeve kontigjente ishin përfshirë detyrimet 26,268,807€ që rrjedhin nga fletë zotimet e lëshuara nga programi për TMJIShP, detyrimet 2,527,631€ nga lëndët e rregullta që janë në pritje për shqyrtim nga Bordi Ekzekutiv për TMJIShP dhe detyrimet 186,915€ nga paditë gjyqësore”, thuhet në raportin e ZKA-së.
Auditori ka gjetur mbi 4.3 milionë Euro fatura të pacientëve të cilët janë trajtuar përmes fletzotimeve të lëshuara për rastet emergjente, të cilat nuk ishin evidentuar fare në regjistrat e detyrimeve të papaguara.
“Nga 150 mostrat e testuara të fletëzotimeve të lëshuara për rastet emergjente në vlerë prej 11,175,261€, kemi vërejtur se në 80 mostra, FSSH nuk i kishte evidentuar në regjistrat e detyrimeve të papaguara faturat e pranuara në vlerë 4,308,262€ të pacientëve që kishin përfunduar trajtimet shëndetësore dhe kishin sjellë raportet mjekësore e financiare, ashtu siç kërkohet me rregullën financiare”, thuhet në raportin e ZKA-së.
ZKA ka gjetur se FSSH e kishte mbivlerësuar regjistrin e detyrimeve kontigjente me 505,900 Euro, prej të cilave 265,900 kishin qenë detyrime të papaguara ndërsa 240 mijë veçse ishin paguar. Ndërkaq 128 mijë e 321 detyrime kontigjente nga viti 2020 nuk ishin përfshirë fare.
ZKA tutje ka ripërsëritur se pacientët në 33 raste nuk i kishin dorëzuar dëshmitë e trajtimit të subvencionuar nga FSSH të cilat kapin vlerën prej 446,429 Euro.
ZKA në këtë raport poashtu ka evidentuar se që nga viti 2020, 44 pajisje të IT-së (monitor dhe kompjuter) me vlerë 33,496 Euro nuk ishin funksionalizuar fare. Këto pajisje ishin blerë në vitin 2019 duke u bazuar në numrin e stafit të aprovuar me buxhetin e atij viti. Atë kohë ishin planifikuar 98 të punësuar ndërsa një vit më vonë numri ishte reduktuar në 52.
Në këtë raport është përfshirë edhe një letër konfirmim i nënshkruar vetëm nga z.v.drejtori i FSSH-së Bujar Kaçuri, i cili konfirmon se e ka pranuar raportin e ZKA-së dhe se pajtohet me gjetjet dhe rekomandimet.
ZKA ka filluar edhe një auditim tjetër për performancën e FSSH-së dhe Programit për Trajtimin e Pacientëve Jashtë Institucioneve Publike ku do të përfshihet edhe Shërbimi Spitalor Klinik dhe Universitar. Ky auditim do të bëhet nga viti 2019 deri në vitin 2023.
Kujtojmë se Bordi i FSSH-së i kryesuar nga zv.ministrja Dafina Gexha-Bunjaku vitin e kaluar e ka shkarkuar ish-drejtorin Fatmir Plakiqi. Ky i fundit kishte ardhur në krye të FSSH-së në fund të vitit 2017 i emëruar nga ish-ministri Uran Ismaili, ndërsa ishte zgjedhur drejtor nga Bordi në vitin 2018. Atë kohë ky Bord udhëhiqej nga Sekretari i MSH-së Naim Bardiqi.
Gazeta Shneta vitin e kaluar ka raportuar për një rast të dyshuar për fryrje të faturës nga një spital në Turqi për trajtimin e një 10-vjeçare.
Pacientja fatkeqësisht nuk i mbijetoi sëmundjes së leukemisë akute dhe nuk arriti të kryente tranplantin e palcës kockore në spitalin ‘Medical Park’ në Turqi. Prindi e kishte njoftuar Fondin e Sigurimeve Shëndetësore më datën 11.06.2021 se vajza ka vdekur dhe nuk ka arritur t’i nënshtrohej intervenimit për tranplant. Pas njoftimit të prindit, lënda u dërgua në rishqyrtim tek Bordi Ekzekutiv i cili e reduktoi shumën në 49 mijë euro më 14.07.2021, nga 138 mijë euro sa ishte në fillim. Por në fakt FSSH e kishte kryer pagesën e plotë më 28.06.2021, rreth dy javë pas njoftimit të prindit se vajza ka ndërruar jetë. /Gazeta Shneta/