Auditori ka gjetur se QKUK dhe Spitali i Mitrovicës kanë paguar të njëjtën kompani për servisim mbi 70 mijë euro pa raporte të cilat do të dokumentonin punën e kryer nga kompania. QKUK deklaron se këto pagesa janë arsyetuar në draft-komentet për ZKA-në
Zyra Kombëtare e Auditorit ka publikuar raportin për SHSKUK-në për vitin e kaluar. Raporti ka evidentuar shkelje në pagesat për servisimin e pajisjeve në QKUK dhe Spitalin e Mitrovicës me të njëjtë kompani. Në raport është theksuar çështja e kontratës kornizë “Servisimi dhe mirëmbajtja e pajisjeve mjekësore të anestezionit” në vlerë 455,894€.
ZKA në këtë kontratë ka vërejtur se “në dy pagesa në vlerë prej 75,064€ raportet e punës së servisimit nuk e arsyetonin shumën totale të pagesave. Auditimi ynë ka rezultuar me faktin se nga shuma prej 75,064€ raportet e punës për servisim arsyetonin vetëm shumën prej 14,784€, ndërsa vlera 63,883€, nuk ishte e dokumentuar me raporte që tregon se është kryer servisimi”, shkruan Gazeta Shneta.
Ndërkaq njëjtë kishte vepruar edhe Spitali i Mitrovicës në kontratën “Mirëmbajtja dhe servisimi i aparateve mjekësore të anestezionit” me po të njëjtin operator me vlerë prej 113,931€.
“Testimi i një pagesë në vlerë prej 15,381€ për servisim të pajisjeve mjekësore ka rezultuar me faktin se raportet e punës për servisim nga Operatori i angazhuar për servisim nuk e mbulonin shumën totale të pagesës. Raportet e punës për servisim mbulonin vetëm shumën prej 8,401€ gjersa pjesa prej 6,980€, nuk ishte e dokumentuar me raporte që tregon se është kryer servisimi”, thuhet në raport.
Sipas raportit, kompania kishte faturuar shërbimet e saj në mënyrë lineare çdo tre muaj, e jo bazuar në raportet e punës që kishte kryer. Këto pagesa ishin kryer si rezultat i kontrolleve të dobëta në menaxhimin e kontratës dhe certifikimin e lëndëve.
ZKA ka tërhequr vërejtjen se rreziku i nënshkrimit të raporteve për pranimin e shërbimeve nga menaxheri kontratës, për shërbimet e pa kryera nga ana e kontraktorit ka shkaktuar dëmtimin e buxhetit të ministrisë prej 70,863€, si dhe mos përfitimin e vlerës për para.
ZKA ka rekomanduar Bordin Drejtues dhe Drejtorin e Përgjithshëm “që të marr masa të menjëhershme për shqyrtimin e këtij rasti dhe të siguroj se të gjitha pagesat për servisim të pajisjeve mjekësore për të cilat nuk janë pranuar shërbimet, të kërkoj nga operatori që t’i kthej mjetet në buxhetin e ShSKUK. Gjithashtu, duhet të forcohen masat e përgjegjësisë që menaxherët e kontratave të mos nënshkruajnë asnjë raport pranimi, para se shërbimet të jenë kryer”.
Por nga SHSKUK thonë se këto pagesa janë arsyetuar në draft-komentet e Zyrës Kombëtare të Auditimit.
“Poashtu, pagesat i kanë arsyetuar QKUK dhe Spitali i Mitrovicës. Me datë 06.05.2019, drejtori i përgjithshëm ka bërë urdhëresë për të gjitha njësitë, ku është kërkuar që mos të bëhet asnjë pagesë nga institucionet shëndetësore pjesë e SHSKUK pa raportin e komisioneve pranuese. Poashtu, është kërkuar të bëhet planfikim më i mirë i procedurave të prokurimit dhe menaxhimi i kontratave të bëhet në harmoni me ligjet në fuqi”, thuhet në përgjigjen e SHSKUK-së.
ZKA edhe në raportin e vitit 2017 pati gjetur parregullësi në menaxhimin e kontratave në SHSKUK. /Gazeta Shneta/