Deputeti i LDK-së, neurokirurgu Haxhi Avdyli, ka dhënë ide se si të dilet nga greva e cila aktualisht po mbahet nga klinikat e bllokut kirurgjik në QKUK. Ai ka thënë se përveç ligjit të pagave duhet të krijohet edhe fondi për performancë me anë të të cilit kirurgët që punojnë më shumë të mos paguhen njëjtë sikurse ata që punojnë më pak
Avdyli ka thënë se greva e kirurgëve është me kërkesa legjitime, por thotë se në të njëjtën kohë ka dëmtuar edhe pacientët. “Grevat janë përkrah nga ne për shkak të kërkesave legjitime por mendoj se kanë dëmtuar edhe pacientët. Interesat e grevistëve janë legjitime, në disa raste janë të adresuara ndërsa në disa raste jo. Ligji për paga është bërë në mënyrë jotransparente dhe ka shkaktuar pabarazi”, ka thënë mjeku deputet.
Fajin për këtë ai ia ka lënë Qeverisë për të cilën thotë se ia rriti pagat vetes, rrjedhimisht edhe sektorit të gjyqësisë e prokurorisë, çka shkaktoi pakënaqësi tek sektorët tjerë.
“Mendoj se në momente të caktuara nuk kanë pas zgjidhje tjetër për t’i adresuar kërkesat e tyre përveç grevës, sepse mjekët specialistë janë njerëzit më të shkolluar dhe kanë një shkollim shumë të gjatë, por në të njëjtën kohë edhe një përgjegjësi të madhe profesionale sepse nga dora e kirurgët varet jeta e njeriut”, ka shtuar Avdyli.
Ai ka dhënë edhe një ide se si mund të dilet nga kjo situatë. Sipas Avdylit, institucionet mund të krijojnë një fond të performancës me anë të të cilit kirurgët që punojnë më shumë nuk do të paguheshin njëjtë sikurse ata që punojnë më pak.
“Një rrogë bazë dhe një fond për performancë do t’i mbulonte këto pakënaqësi. Ka kirurg që punojnë më shumë që janë të nivelit shumë të lartë por edhe të nivelit të ulët. Ka mjek që punojnë më shumë që janë më të aftë dhe që kanë më shumë pacientë”, ka deklaruar Avdyli.
Kujtojmë se Gazeta Shneta ka raportuar për performancën e kirurgëve të QKUK-së. Vet Avdyli ka kryer vetëm një operacion gjatë vitit 2018, por i njëjti me marrjen e pozitës së deputetit, atë të specialistit e ka të ngrirë dhe nuk paguhet.
Ndërsa në klinikat tjera sikurse në Kirurgjinë Abdominale dhe Klinikën e Syve, dominojnë dembelët me më pak se 50 operacione për 12 muaj, derisa kolegë të tyre kanë nga 200 deri në 600 operacione për një vit. /Gazeta Shneta/
Intervista e plotë për Gazeten Observer: