Elvir Azizi drejtor i SHSKUK-së ka thënë sot se disa specialistë në spitalet e përgjithshme po refuzojnë të mbajnë kujdestari në cilësinë e internistave.
Azizi këtë deklaratë e ka dhënë në mbledhjen e Bordit Drejtues në pikën e rendit të ditës për punësimin e mjekëve specialistë e cila u propozua nga anëtari Dr. Ismet Ramadani, shkruan Gazeta Shneta.
Ramadani tha se ka mjaft mjekë specialistë të pa punë, e ndërkohë që disa spitale vuajnë nga mungesa e tyre.
“Ka mjaft mjek specialistë të pa punë që po presin. Ka disa mjekë endokrinolog të pa punë, kurse në SP Vushtrri punon vetëm një endokrinologe. Këta mjekë munden me u punësu në spitalet e përgjithshme”, ka deklaruar Ramadani.
Azizi tha se është në dijeni për kërkesat e spitaleve të përgjithshme për punësimin e mjekëve, pasi sipas tij këto lista i ka kërkuar drejtori mjekësor i SHSKUK-së.
Por ai ka thënë se ekziston një telashe me disa mjekë specialistë të cilët po refuzojnë të mbajnë kujdestari në cilësinë e internistave.
“Mjekë gastro dhe endokrinolog nuk dojnë me kujdestaru si internista. Na mungon një përshkrim i detyrave për këta specialista”, ka deklaruar Azizi.
Ndër të tjera Azizi ka thënë se për vitin e ardhshëm do të ndahet një vijë buxhetore në vlerë 1 milion Euro për trajnimin e mjekëve. /Gazeta Shneta/