Një ndër synimet e projektit “Angazhimi i Burrave në Atësi” është që t’i vetëdijësojnë burrat në kujdesin e fëmijëve, përkatësisht në një baba ideal, i cili njëkohësisht bën edhe balancin e barazisë gjinore.
Kadri Gashi nga Rrjeti i Edukatorëve Bashkëmoshatarët thotë se projekti paraqet praktikat më të mira në çift, pozitivizmin në prindërim dhe marrëdhënie të shëndetshme, duke mënjanuar dhunën ndaj fëmijëve dhe grave
“Ideja e kësaj iniciative ka rrjedhë me qëllim të promovimit të barazisë në çift, prindërinë pozitive dhe marrëdhënie të shëndetshme përmes parandalimit të dhunës dhe rritjes së fëmijëve mbi idenë e barazisë”, tha Gashi.
Sipas tij, aktivitetet e projektit përfshijnë diskutime me prindër, arsimtarë, studentë, ofruesit e kujdesit shëndetësor dhe trajnerë të sporteve të ndryshme, ndikimi i të cilëve luan një rol të veçantë në ndërtimin e personalitetit.
“Ky projekt u ka mundësuar shumë burrave e grave të ofrojnë përfshirje më të madhe të baballarëve në lindje dhe kujdesin ndaj fëmijës, ka rritur vetëdijesimin e baballarëve dhe nënave dhe efikasitetin në përkujdesje të përbashkët. Të gjithë personazhet e përfshirë në projekt kanë qenë baballarë me profesione të ndryshme”, tha ai.
Rrjeti i Edukatorëve Bashkëmoshatarë si organizatë jo qeveritare ka marrë iniciativën që të publikojë edhe librin “Baballarët e Kosovës” dhe të krijojë një ekspozitë, në mënyrë që roli i baballarëve aktiv të promovohet më tutje.
Drejtor Ekzekutiv i Rrjetit të Edukatorëve Bashkëmoshatarë, Bujar Fejzullahu, tha për KALLXO.com se në një familje të shëndoshë duhet angazhim nga të dy prindërit.
Ai tha se Projekti është duke u implementuar nga Rrjeti i Edukatorëve Bashkëmoshatarë PEN dhe i mbështetur nga Agjensia e Kombeve të Bashkuara për Shëndet dhe të Drejtat Riprodhuese në Kosovë, CARE International në Ballkan, Agjencioni Austriak për Bashkëpunim (ADC) dhe OAK Foundation.