“Butterfly” dhe QIKA do të shpërndajnë peceta në Ditën e Higjienës Menstruale

2021-05-06 në ora 16:34

Organizata QIKA dhe kompania “Butterfly Kosova” do të shpërndajnë peceta në shkollat fillore dhe të mesme, në Ditën Ndërkombëtare të Higjienës Menstruale.

Ky donacion do të shpërndahet në kuadër të fushatës “Java kundër varfërisë menstruale dhe stigmatizimit të menstruacioneve”, transmeton Gazeta Shneta.

Lexoni njoftimin e plotë të QIKA-së:

Peceta menstruale falas për fushatën kundër varfërisë menstruale dhe stigmatizimit të menstruacioneve

Sot, QIKA e përfaqësuar nga Leonida Molliqaj, Drejtore Ekzekutive, ka nënshkruar marrëveshje bashkëpunimi me kompaninë Butterfly, përfaqësuar nga pronari Ragip Dërmaku, për realizimin e fushatës “Java kundër varfërisë menstruale dhe stigmatizimit të menstruacioneve ”. Kjo fushatë e cila do të filloj nga data 24 deri më datën 28 maj, ka synim që të problematizoj varfërinë menstruale si dhe të ofroj informata të sakta mbi shëndetin menstrual.

Butterfly Kosova ka dhënë donacion për QIKA 24,000 peceta menstruale dhe 4,000 teste për identifikimin e infeksioneve. Ky donacion do të shpërndahet në Ditën Ndërkombëtare të Higjienës Menstruale në shkolla fillore dhe të mesme nëpër disa komuna të Kosovës, në të gjithë kampusin e Universitetit të Prishtinës si dhe në disa kafiteri të kryeqytetit.

Shumë persona që kanë menstruacione privohen nga qasja në informata dhe në produkte higjienike menstruale. Me anë të fushatës një javore, QIKA synon që të kundërshtoj stigmatizimin e menstruacioneve duke ofruar çdo ditë informata të sakta mbi shëndetin menstrual si dhe të luftoj varfërinë menstruale me anë të shpërndarjes falas të pecetave menstruale në hapësira publike.

Falenderojmë kompaninë Butterfly për donacionin dhe bashkëpunimin e jashtëzakonshëm.