Qeveria e Kosovës ka marr sot vendim për ndryshimin e destinimit të buxhetit të paraparë për specializantët, tek lufta kundër pandemisë Covid-19.
“Në mbledhje është miratuar kërkesa e Ministrisë së Shëndetësisë për transferim të mjeteve në shumë prej 820,000 euro nga kategoria e subvencioneve te programi aftësimi specialistik dhe EVM në programin Shërbimet Përkatëse Farmaceutike dhe do të shfrytëzohen për luftimin e pandemisë Covid 19”, thuhet në njoftimin e Qeverisë.
Gazeta Shneta ka siguruar edhe vendimin e Qeverisë për ndarjen e këtyre mjeteve të cilat ishin paraparë për specializantët dhe edukimin e vazhduar. Në vendim nuk sqarohet nëse këto mjete janë nga buxheti për specializantët që janë në proces, apo janë mjete të parapara për konkursin e ri i cili megjithatë nuk pritet të ndodhë pasi ende nuk është nënshkruar udhëzimi i ri administrativ.
Kujtojmë se në Kosovë nuk ka pasur konkurs për specializantë që nga viti 2016 dhe kjo ka shkaktuar mungesë të disa profileve e madje edhe mbyllje të shërbimeve në mungesë të specialistëve sidomos në spitalet e përgjithshme. /Gazeta Shneta/