Ministria e Shëndetësisë ka njoftuar për certifikimin e 33 koordinatorëve të cilësisë në kuadër të Shërbimit Spitalor Klinik dhe Universitar të Kosovës (ShSKUK).
Sipas njoftimit të MSh-së, trajnimi i organizuar në bashkëpunim me SHSKUK-në dhe me mbështetjen e partnerit, Shërbime të Integruara Shëndetësore (IHS), është realizuar për herë të parë për këtë kategori në nivelin tretësor të kujdesit shëndetësor.
Trajnimi ka zgjatur katër ditë dhe ka pasur për qëllim ngritjen e kapaciteteve teorike dhe praktike të zyrtarëve të cilësisë, në funksion të hartimit dhe zbatimit të Sistemit të Menaxhimit të Cilësisë në institucionet spitalore.
Në njoftim thuhet se ky aktivitet përbën një hap fillestar në zhvillimin e proceseve të menaxhimit të cilësisë në nivel spitalor.
“Në këtë trajnim janë certifikuar 33 koordinatorë të cilësisë, me synim përmirësimin e cilësisë së shërbimeve shëndetësore, rritjen e sigurisë së pacientëve dhe fuqizimin e kapaciteteve profesionale në kujdesin spitalor”, thuhet tutje në njoftim. /Gazeta Shneta/