Komisioni Qendror i Zgjedhjeve i udhëhequr nga Hysni Bajrami në Odën e Infermierëve të Kosovës ka certifikuar kandidatët për kryetar të kësaj organizate.
Kandidatët e certifikuar janë Agron Bytyqi, Nexhmije Gori dhe Vlora Ejpi. Bytyqi dhe Gori kanë dal me disa premtime për kolegët e tyre, shkruan Gazeta Shneta.
Gori ka premtuar se me mbështetjen e kolegëve të saj do të jetë në shërbimin e tyre. “Tashme KQZ ka certifikuar listen per kryetar te OIK. Me mbeshtetjen Tuaj pa dyshim se do te jemi ne sherbimin Tuaj!”, ka shkruar ajo.
Në anën tjetër Bytyqi ka thënë se nëse zgjidhet kryetar do të punojë për fuqizimin e infermierisë dhe profesioneve tjera anëtare të OIK.
“OIK është organizatë e pavarur e cila mbronë dhe prezanton interesat profesionale në dimensione të ndryshme. Sot Kam nderin t’ju drejtohem dhe të kërkoj votëbesimin tuaj për pozitën e kryetarit të OIK në zgjedhjet e 27 shkurtit. Premtoj që do të përdor të gjitha shkathtësitë e mia profesionale dhe shkencore për të sjellë pozitivitet dhe frymëzim për ata që më rrethojnë. Nëpërmjet punës sime, synoj të përhap mesazhe shprese, uniteti dhe qëndrueshmërie – vlera që janë thelbësore për profesionin tonë. Gjithashtu së bashku do të punojmë në ngritjen dhe fuqizimin e infermierisë dhe profesioneve tjera anëtare për të qenë aleat në përpjekjet tuaja për të përmirësuar kujdesin shëndetësor në Kosovë”, ka shkruar Bytyqi. /Gazeta Shneta/