Drejtori i Shërbimit Spitalor Klinik Universitar të Kosovës, Dr. Curr Gjocaj, nuk pranon të merr përgjegjësi për vdekjen e dyshimtë të pacientëve.
Ndonëse është përgjegjësi kryesor nën të cilin funksionon SHSKUK-ja, Gjocaj thotë se pozita e tij është vetëm administrative, raporton Gazeta Shneta.
Madje ai habitet kur pyetet nëse do të jap dorëheqje për këtë rast.
“A punojë unë në salla, me bombola? Unë jam staf administrativ, por nuk punoj në salla”, ka deklaruar Gjocaj.
Ai ka tentuar që të nxjerr situata hipotetike duke e ndërlidhur me këtë rast kryetarin e komunës së Prishtinës, Shpend Ahmeti.
“Edhe Shpend Ahmeti nëse mund të ketë nevojë për këtë gaz, çdo lloj komune merr këtë gaz prej këtyre kompanive”, ka thënë ai, duke mos pranuar të jap përgjigje direkte për përgjegjësinë e tij si drejtor.
Ai nuk ka pranuar të flas as nëse do të ketë pezullime të stafit të mjekëve ku kanë ndodhur vdekjet e pacientëve.
Gjocaj ka deklaruar se janë vetëm 2 raste të vdekjeve të dyshimta.
“2 pacientë kanë vdekur atë ditë që kanë hyrë në operacion. Njëri ka mbetur i vdekur në sallën e operacionit, ndërsa tjetri pasi është kryer operacioni. I treti ka vdekur po atë ditë, por nuk ka hyrë në operacion dhe nuk ka marr gaz oksidul”, ka deklaruar Gjocaj.
Drejtori i SHSKUK-së ka thënë se nuk kanë tentuar të fshehin rastin, ndonëse nuk kanë lajmëruar prokurorinë për vdekje të dyshimta po atë ditë.
“Kemi lajmëruar inspektoratin dhe disa të hetuesisë që i njohim dhe kemi kërkuar që të gjenden shkaqet”, ka pohuar ai. /Gazeta Shneta/