Deputetët e Partisë Demokratike të Kosovës, Flora Brovina dhe Bekim Haxhiu, i kanë bërë favor sot ministrit të Shëndetësisë Uran Ismaili duke mos marr pjesë në mbledhjen e Komisionit e cila dështoi në mungesë të kuorumit.
Ismaili në këtë mbledhje do të duhej të raportonte për revidimin e listës esenciale të barnave, proces ky që ende nuk ka përfunduar, si dhe për furnizimin e QKUK-së me infuzione nga Serbia. Për këtë çështje ka pasur edhe një reagim të ashpër nga Ministri i Tregtisë i cili kërkoi që të rishikohet dhënia e kontratës për këtë kompani, shkruan Gazeta Shneta.
Por Kryetarja e Komisionit Besa Baftiu nuk ka mundur ta hap mbledhjen në mungesë të deputetëve. Ajo tha se i ka parë deputetët duke qëndruar në hapësirat e Kuvendit, por nuk e di arsyen pse nuk kanë shkuar në sallë.
“Ministri është i pranishëm me stafin e tij mirëpo deputetët nuk janë këtu edhe pse e kanë lajmëruar ardhjen. Në mungesë të kuorumit ne nuk e hapim mbledhjen dhe mbetet që kjo mbledhje të mbahet ndonjë ditë tjetër. Disa nga deputetët janë këtu, por nuk e di arsyen pse s’po dojnë me ardhë”, tha kryetarja e komisionit, Besa Baftiu.
Në mbledhje kanë munguar edhe deputetët Time Kadriaj e AAK-së dhe Fatmire Kollçaku nga LVV, por të cilat kishin paralajëmruar më herët se gjenden jashtë vendit. Ndërsa ka munguar edhe deputeti Fikrim Damka nga Grupi 6+. /Gazeta Shneta/