Deputeti i Kuvendit Enver Hoti ka kritikuar ashpër kryeshefin e AKPM-së Jeton Shala duke i thënë se “ju nuk jeni i interesuar që ta bëni funksionale këtë agjenci”
Gjatë ditës së sotme është mbajtur mbledhja e Komisionit për Shëndetësi të Kuvendit të Kosovës, ku ka raportuar kryeshefi i Agjencisë Kosovare për Produkte Medicinale, Jeton Shala.
Deputetët në përgjithësi nuk kanë qenë të informuar sa duhet në lidhje me detyrat dhe përgjegjësit e AKPM-së dhe kryeshefit të saj, shkruan Gazeta Shneta.
Më kritiku ka qenë deputeti i Nismës, Enver Hoti, i cili ka ngritur dyshime mbi profesionalizmin e zyrtarëve të kësaj agjencie, si dhe përgjegjësitë ligjore të Shalës.
“Ju po ankoheni se nuk keni staf të mjaftueshëm, por edhe ata që i keni, shumica nuk janë profesionitë. Kjo vlen sidomos për qata që janë punësuar nga viti 2016 e tutje dhe ju e dini për çka e kam fjalën”, ka deklaruar Hoti.
Tutje ai ka kritikuar ashpër Shalën duke i thënë se nuk është i interesuar që ta vë në funksion të plotë këtë agjenci.
“Pas të gjitha këtyre dyshimeve të ngritura, ju vet nuk jeni shumë i interesuar që ta bëni funksional këtë institucion i cili ka të bëj me jetën e qytetarëve të Kosovës. Pa siguria në barna rrezikon jetën e shoqërisë tonë”, është shprehur Hoti.
Deputetët e kanë pyetur Shalën edhe për dyshimet për keqpërdorime të mbi 300 mijë eurove në këtë agjenci, ku tashmë është arrestuar edhe një zyrtar i financave nga Policia e Kosovës. Por deputetët kanë kërkuar vetëm të dijnë se çfarë ka ndodhur, ndërsa nuk kanë kërkuar përgjigje se si ndodhën keqpërdorimet pa dijeninë e kryeshefit.
Shala ka deklaruar se para se të njoftonte Policinë mbi dyshimet për keqpërdorime, kishte kërkuar raportet nga bankat si dhe zotimet për tërheqjen e avanseve. Këto keqpërdorime ai i ka quajtur “krim kibernetik”.
“Të njëjtat para që janë deponuar në atë kod, pas disa dite janë tërhequr. Ky është një krim kibernetik dhe ende nuk e dimë se si ka ndodhur”, ka deklaruar Shala.
Aferat dhe keqpërdorimet në këtë institucion i ka ngritur edhe deputetja e Vetëvendosjes, Fatmire Kollçaku, ndërsa Bekim Haxhiu ka folur për barnat që vijnë nga Kina e India në Kosovë.
Shala ka deklaruar se kanë mungesë të stafit profesional në laboratorin e AKPM-së për analizat e cilësisë së barnave.
Deputetët kanë thënë se do të përkrahin kërkesat e agjencisë për të shtuar numrin e stafit dhe profesionistëve. /Gazeta Shneta/