Deputetja e Lëvizjes Vetëvendosje dhe kryetarja e Komisionit për Shëndetësisë, Fatmire Mulhaxha-Kollçaku, ka kritikuar mjekët e sektorit publik të cilët mbajnë disa pozita pune.
Deputetja ka thënë se shumë mjekë janë të angazhuar në pozita si kryetar, shefa, anëtarë Bordi, dhe në të njëjtën kohë janë të punësuar me orar të plotë në SHSKUK, shkruan Gazeta Shneta.
“Diku Kryetarë, diku shefa, diku anëtarë të ndonjë Bordi, e me punë të “rregullt” dhe me orar të plotë (8 orë???!!!!) në SHSKUK….publik e privat, 3 apo 4 vende të punës, përfshi disa poste i njëjti individ. Plus shumë prej tyre të angazhuar edhe si mësimdhënës”, ka shkruar Mulhaxha-Kollçaku.
Këta mjekë deputetja e VV-së i ka quajtur ‘supermenët e shëndetësisë’, për të cilët ka paralajmëruar se do t’i ndalin.
“Gjendje e trashëguar. Supermenat e shëndetësisë. BollMa! Ky grup i vë hije të keqe pjesës më të madhe të punëtorëve shëndetësorë që punojnë me profesionalizëm dhe nder”, ka shkruar deputetja, e cila mban edhe pozitën e epidemiologes në Institutin Kombëtar të Shëndetit Publik në Pejë. /Gazeta Shneta/