Ashtu siç ishte paraparë, Dita Botërore e Shëndetit u shënua me shumë aktivitete në të mirë të qytetarëve në pika të ndryshme të kryeqytetit.
Organizim ky i cili ishte nё bashkëpunim i Drejtorisë së Shëndetësisë në Prishtinë me Ministrinë e Mbrojtjes, përkatësisht me departamentin mjekësor të FSK dhe studentët e Kolegjit “Universum”.
Në pikën në sheshin “Zahir Pajaziti”, ku ekipa mjekësore ofroj shërbime për qytetarët, i pranishëm ishte edhe kryetari i Prishtinës, Përparim Rama.
Rama theksoi se ideja e tyre ka qenë që udhëzimet ndaj qytetarëve të jenë të ndërlidhura rreth preventivës, ku sipas tij më mirë është të ndërmarrim masa paraprake për mbrojtjen e shëndetit se sa trajtimin e problemeve pastaj.
“Kemi organizuar disa pika në Ditën Ndërkombëtare të Shëndetësisë, disa pika ku po e shikojmë shëndetin e qytetarëve të Prishtinës, po ashtu edhe udhëzimet e ndryshme të mjekëve. Ideja është që udhëzimet tona ndaj qytetarëve të jenë të ndërlidhura rreth preventivës, më mirë është të ndërmarrim masa paraprake për mbrojtjen e shëndetit se sa trajtimin e problemeve pastaj”, tha i pari i Prishtinës.
“Preventiva është edhe aspekt i gjithë strategjisë sonë të trajtimit të qytetit, të hapësirave publike të ndërlidhjeve të qendrës me zonat përreth që të mundësojmë një lëvizje më të lehtë dhe më të mirë që qytetarët e Prishtinës të kenë mundësinë të lëvizin më shumë. Sugjerohet që më së paku 30 minuta në ditë të ecet. Këto janë gjëra të cilat po diskutohen këtu. Kemi një bashkëpunim fantastik edhe me Ministrinë e Mbrojtjes”, tha tutje Rama.
I pranishëm në këtë aktivitet ishte edhe drejtori i Shëndetësisë në Komunën e Prishtinës, Izet Sadiku i cili tha se mjekësia primare është prioritet i komunës.
“Bashkërisht po e forcojmë mjekësinë primare që është prioritet i komunës. Në mjeksinë primare fokusi kryesor është parandalim. Kemi bashkuar forcat me qëllim që ti informojmë qytetarët për rëndësinë që ka parandalimi i sëmundjeve që është një kriter shumë i rëndësishëm për shëndetin e njeriut”, tha ai.
Numri i qytetarëve të cilët ishin të interesuar të kontrolloheshin apo të merrnin një këshillë mjekësore, ishte padyshim mjaft i kënaqshëm edhe për ekipën mjekësore në tendën e vendosur në shesh.
Specialistja e mjekësisë familjare, Florina Grezda tha se janë të kënaqur me numrin e qytetarëve që kanë shpreh interes që nga mengjesi në këtë aktivitet.
“Duke marrë parasyshë kohën e cila është pak me shi, ky aktivitet është realizuar më shumë sukses, interesimi i qytetarëve është shumë i madhë”, tha ajo.
Tutje Grezda theksoi se në tendën e vendosur në sheshin “Zahir Pajaziti”, deri tani kanë arritur të marrin shërbime mjekëore pothuajse 100 qytetarë.
Padyshim nevojën më të madhe për një kontroll të shpejtë qoftë të tensionit, apo të kontrollimit të sheqerit në gjak e kanë edhe moshat më të vjetra.
Një qytetare e moshuar nga Prishtina, e vlerëson këtë aktivitet të komunes si një veprim të menduar mirë.
“Është shumë i qëlluar ky aktivitet, se në si të moshuar që jemi, shpesh e kemi me përtesë kontrollat të mjeku, kujdesin për sheqer e tension, duhet më shumë të kujdesemi për shëndetin”, tha ajo për Gazetën Shneta./Gazeta Shneta