Donika Shahini-Lami është psikologe klinike dhe gazetare e njohur në kohën e ngjarjeve të mëdha e të rëndësishme të popullit në Kosovë, si ajo e luftës. Me datën pesë të muajit dhjetor, ajo u shpërblye me merita të larta si “Figura publike më mbështetëse e vitit” nga organizata joqeveritare TOKA.
Në Ditën Ndërkombëtare të Vullnetarizmit të vitit 2024, TOKA ka shpërblyer për kontributin e dhënë ndërvite, znj. Shahini-Lami. Ky çmim është i dedikuar për mbledhjen e dëshmive dhe materialeve historike për ngjarjet e kohës së luftës, si në rastin e ruajtjes së fletores së fëmijëve të familjes Jashari.
Sot kjo fletore që daton nga viti 1998, simbolizon të vërtetën e përjetimeve dhe padrejtësive të bëra ndaj popullit kosovar, dokumentimi i së cilës mund ta gjeni të dhuruar në muzeun “Shtëpia e Gazetarëve” (Reporting House) në Prishtinë.
Që nga viti 1997, Shahini-Lami ka kontribuar në shërbimin e buletinit online të QIK (Qendra e Informacionit të Kosovës). Dhe si gazetare për revistën “KOMBI” si dhe njëkohësisht producente lokale për televizionin publik japonez NHK. Ajo ishte në ekipin e parë televiziv që raportoi nga Prekazi pas masakrës së familjes Jashari më 5-6 mars 1998.
Znj. Shahini–Lami, si një psikologe klinike, sot ka një rol aktiv në organizimin e aktiviteteve në lidhje me shëndetin mendor dhe mbështetjen psikologjike, duke ndihmuar në licencimin dhe ri-licencimin e psikologëve dhe profesionistëve të fushave të ngjashme në kuadër të Odës së Infermierëve të Kosovës (OIK).
Ajo është themeluese dhe drejtore e Qendrës Kosovare të Shëndetit Mendor “ORA” e cila ofron shërbime të këshillimit, psikoterapisë dhe trajtimit për probleme të ndryshme psikologjike dhe sociale, përfshirë stresin post-traumatik dhe dhunën në familje. /Gazeta Shneta/