Drejtori i Drejtoratit për Shëndetësi në Komunën e Vushtrrisë Lorik Maxhuni, ka mohuar pretendimet e Inspektoratit Shëndetësor për mos evidentimin e vaksinave. Ai ka thënë se vaksinat janë regjistuar me vonesë, por për shkak të problemeve teknik në Sistemin Informativ Shëndetësor i cili menaxhohet nga Ministria e Shëndetësisë.
Lorik Maxhuni, drejtor për shëndetësi në Komunën e Vushtrrisë, ka mohuar të ketë ndodhur mos regjistrimi i 200 dozave të vaksinave të gripit në Qendrën Kryesore të Mjekësisë Familjare, shkruan Gazeta Shneta.
Maxhuni ka thënë se asnjë vaksinë nuk ka humbur, porse regjistrimi i tyre është bërë me vonesë për shkak të problemve teknik në Sistemin Informativ Shëndetësor.
Sipas tij, situata e krijuar është paraqitur në mënyrë të gabuar dhe është politizuar nga disa individë.
“Kjo situatë e cila është paraqitur në mënyrë të gabuar dhe e politizuar nga disa individë. Siç e kemi sqaruar, nuk ka pasur asnjë zhdukje apo keqpërdorim të vaksinave të gjitha janë administruar sipas protokolleve ose janë në stok. Problemi ka qenë teknik, në sistemin elektronik të raportimit i cili menaxhohet nga Ministria e Shëndetësisë. Për fat të keq, disa deklarata publike kanë synuar të dëmtojnë imazhin e institucionit dhe të stafit shëndetësor për qëllime politike”, ka thënë Maxhuni.
Sipas tij të gjitha dozat e shpenzuara janë administruar tek pacientët, ndërsa pjesa tjetër ka mbetur në stok.
“Asnjë vaksinë nuk ka humbur. Vaksinat janë administruar sipas rregullave, ndërsa një pjesë ka mbetur në stok. Mospërputhja e evidentuar nga inspektimi lidhet vetëm me faktin që një pjesë e vaksinimeve nuk janë regjistruar në kohë në sistemin elektronik për shkak të problemeve teknike që ekzistojnë prej kohësh dhe për këtë është përgjegjëse Ministria e Shëndetësisë. Pra, është një çështje e raportimit teknik dhe jo një skandal apo keqpërdorim”, ka thënë ai.
Kujtojmë se Inspektorati Shëndetësor e ka gjobitur QKMF-në dhe drejtoreshën e këtij institucioni me nga 5 mijë euro, me pretendimin se nuk i kanë evidentuar rreth 200 doza të vaksinave kundër gripit sezonal. /Gazeta Shneta/