Sot ka ndërruar jetë mjeku i njohur nga Gjakova, Prim. Dr. Ali Iljazi, i cili një kohë të karrierës së tij e ka kaluar në spitalin special për gjinekologji në Gjakovë ‘European Clinic Kosova’.
Kjo klinikë ia ka dedikuar një shkrim mjekut të ndjerë, vdekjen e të cilit e ka quajtur humbje të pazëvendësueshme.
“Shumë e vështirë të shkruash për humbjen e një mjeku, familjari e prindi model. E dhimbshme që në këtë kohë po humbasim vlerat profesionale dhe njerëzore. Janë humbje të pazëvendësueshme për gjithë mjekësinë, mendimin shkencor e intelektual, për shoqërinë dhe familjen”, thuhet në telegramin e ngushëllimit.
Lexojeni të plotë:
Sot me dhimbje mësuam lajmin për humbjen e Prim.Med.Dr.Sci Ali Iljazi, një mjek e profesionist i shkëlqyer, njerzor e i papërtuar, një pedagog mendjendritur, një njeri që kushdo me krenari e pati mik e shok.
Shumë e vështirë të shkruash për humbjen e një mjeku, familjari e prindi model. E dhimbshme që në këtë kohë po humbasim vlerat profesionale dhe njerëzore. Janë humbje të pazëvendësueshme për gjithë mjekësinë, mendimin shkencor e intelektual, për shoqërinë dhe familjen.
Doktor Ali Iljazi nuk ka nevojë për një jetëshkrim, Doktor Ali Iljazi ështe vet jetëshkrimi. E ka shkruar jetën e tij përmes një lumi të rrjedhshëm, ku notojnë qindra jetë të shpëtuara dhe qindra shpirtra të shëruar. Gjithçka thuhet për një njeri, tek i cili ka rrjedhur natyrshëm dhe vrullshëm virtyti dhe profesionalizmi.
U prehsh në paqe, dr. Ali!