Pavarësisht se pret më shumë start-up-e onkologjike, Evropa po mbetet prapa në zhvillimin e teknologjive kundër kancerit, duke humbur terrenin në disa fusha premtuese të kërkimit përballë SHBA-së dhe Kinës. Kështu thuhet në një raport të ri të publikuar sot nga Zyra Evropiane e Patentave (EPO).
Studimi zbulon se SHBA dhe Kina kryesojnë në tre fushat me rritjen më të shpejtë të kërkimeve për kancerin. Ndërkohë, Japonia dhe Koreja e Jugut kanë ruajtur pozitat e tyre, pavarësisht konkurrencës së shtuar nga Kina, e cila po fiton terren kryesisht në informatikën shëndetësore dhe analizën e imazheve shkruan euronews transmeton GazetaShneta.
Raporti u publikua vetëm një javë pas paraqitjes së “Busullës së Konkurrencës” nga BE-ja, një nismë strategjike që synon forcimin e aftësisë së Evropës për të konkurruar me ekonomitë kryesore globale.
Presidenti i EPO-së, António Campinos, deklaroi: “Ky studim duhet të shërbejë si një thirrje zgjimi për sistemin evropian të inovacionit në onkologji, veçanërisht në kontekstin e raportit të Mario Draghi për të ardhmen e konkurrencës së Evropës.”
Sipas tij, zhvillimi i teknologjive kundër kancerit po ndodh me ritme të shpejta dhe shpesh të paparashikueshme, ndaj Evropa duhet të reagojë për të ruajtur avantazhin e saj konkurrues.
Rritje e ngadaltë në patentat evropiane
Ndërsa aplikimet për patenta në SHBA dhe Kinë po rriten ndjeshëm, Europa ka pësuar rënie në pjesën e saj të tregut gjatë periudhës 2010-2021. Në vitin 2021, Kina madje tejkaloi BE-27 me mbi 2,000 patenta ndërkombëtare në fushën e kancerit.
Megjithatë, Evropa mbetet një lojtar i rëndësishëm, me mbi 17,800 patenta të regjistruara nga aplikantët evropianë dhe 7,500 të tjera nga shtete të tjera anëtare të EPO-së gjatë kësaj periudhe, duke përfaqësuar 23.9% të patentave globale.
Fushat më premtuese të teknologjive për kancer
Studimi identifikon disa fusha premtuese për trajtimin e kancerit, përfshirë informatikën shëndetësore, analizën e imazheve, biopsitë e lëngshme, imunoterapinë me antitrupa, terapi gjenetike dhe imunomodulues molekularë.
Fushat më tradicionale si terapia me citokina, viruset onkolitike dhe terapitë fotodinamike vazhdojnë të kenë rëndësi. Ndërkohë, trajtimet alternative dhe masat parandaluese me ekstrakte bimore e shtazore po fitojnë gjithashtu vëmendje.
Evropa, përfshirë vende jo anëtare të BE-së si Mbretëria e Bashkuar dhe Zvicra, ka numrin më të madh të start-up-eve onkologjike në botë, me rreth 1,500 entitete krahasuar me 1,325 në SHBA.
Mbretëria e Bashkuar kryeson me 290 start-up-e, e ndjekur nga Franca me 246, Gjermania me 208 dhe Zvicra me 151.
Megjithatë, ndërsa Evropa ka më shumë start-up-e në fazat fillestare sesa SHBA, ajo përballet me sfida për t’i shkallëzuar ato. Vetëm 24% e start-up-eve evropiane kanë arritur fazën e avancuar të rritjes, krahasuar me 40% në SHBA.
“Ekosistemi i gjallë i start-up-eve onkologjike në Evropë është një pikë e ndritur, por këto kompani kanë nevojë për investime dhe mbështetje për të komercializuar me sukses shpikjet e tyre,” tha Campinos./GazetaShneta/