Organizatat Joqeveritare që merren me mbrojtjen e të drejtave të fëmijëve po synojnë të bëjnë inicimin e ndryshimit të Ligjit për Familjen, ligj ky që është në fuqi që nga viti 2004.
Sipas përfaqësuesve të OJQ’ve, por edhe UNICEF’it, ndryshimet rrënjësore duhet të bëhen në definimin e statusit të fëmijëve pa përkujdesje prindërore, si dhe të ndihmohen familjet strehuese që mbikëqyrin fëmijët e që nuk ndihmohen fare nga shteti. Ky takim u mbajt në Ditën Ndërkombëtare të Familjes.
Në shtëpi të këtillë në Shtime, për 13 vjet, janë rritur 18 fëmijë, deri në kohën kur është bërë adoptimi i tyre.
Familja Gashi, me vetiniciativë, është bërë familje strehuese që kujdeset për fëmijët pa përkujdes prindëror dhe kryefamiljarët kanë kaluar të gjitha fazat trajnuese për këtë.
Aktualisht, Behrie Gashi përkujdeset për një vajzë 8 muajshe, të cilën e mori nën kujdes para 6 muajsh.
Gashi tregon se 10 fëmijë që i ka marrë nën mbikëqyrje kanë pasur edhe probleme shëndetësore por falë kujdesit të madh, të gjithë janë shëruar dhe adoptuar në familje të ndryshme.
Familja Gashi i ka 3 fëmijë biologjikë por thotë se nuk i ndan ata me fëmijët që i ka marrë nën mbikëqyrje.
Por, kjo familje si dhe 43 të tjera strehuese nuk marrin kompensim nga shteti, raporton KTV.
Ministria e Punës dhe Mirëqenies Sociale një pagesë mujore prej 150 eurosh e ndan vetëm për fëmijën por jo edhe familjen strehuese.
Kompensim për këto familje kanë kërkuar edhe OJQ’të për mbrojtjen e fëmijëve si dhe UNICEF’i, në një takim të përbashkët ku po synojnë të nisin procedurat për ndryshimin e ligjit për familjen.
Në këtë takim u tha se në Ligjin për Familjen duhet të përcaktohet saktësisht nëse Qendra për Punë Sociale ose Gjykatat të definojnë statusin e fëmijës pasi ai të mbetet pa përkujdesje prindërore.