Drejtori i Klinikës së Kardiologjisë, Dr. Imri Jashari, i është përgjigjur akuzave të drejtorit të Kardiokirurgjisë Dr. Tefk Bekteshi, i cili tha se lista e pritjes së pacientëve po shtohet pasi po referohen pacientë për koronarografi pa nevojë. Jashari thotë se profesionalisht nuk ka koronarografi të panevojshme, por edhe nëse ka ndonjë rast të tillë atëherë kërkon të informohet
Jashari në një bisedë për Gazetën Shneta shpjegon se koronarografia shërben si metodë diagnostike dhe terapeuike dhe është e vetmja metodë e cila garanton rezultat të qind për qind mbi statusin dhe gjendjen e arterieve të zemrës. “Nuk ekziston metodë tjetër e cila na ofron këtë siguri nëse ekziston një sëmundje apo nuk ekziston”, deklaron kardiologu.
Ai shton se në kuadër të metodave diagnostike në QKUK është edhe ergometria e cila përcakton nëse duhet të bëhet një koronarografi apo jo. Siguria e rezultatit në ergometri është e lartë por jo edhe aq sa do të na garantonte një rezultat të plotë, thekson Jashari.
“Llogaritet rreth 76-78 për qind të rezultatit të ergometrisë që tregon saktësinë e statutit të enëve të zemrës. Tani çka ngjan me ato 22-24 për qind. Aty është një vakum që çdo raport apo çdo vlerësim mund të bëhet gabim, të keqinterpretohet ose mos të verifikohet. Ekzistojnë raste të shpeshta që sigurisht çdo kardiologu që merret me diagnostikë dhe bën ergometrim, ka pas mundësi që të sprovohet një herë në jetë që ergometria del pozitive apo negative dhe pas një kohe të shkurt pacienti pëson infarkt. Dhe pasi bëhet koronarografi diagnostikohet me ndryshime të mëdha në enët e gjakut”, shpjegon tutje Jashari.
Drejtori i Kardiologjisë thotë se nuk mund të ketë koronarografi të panevojshme edhe kur ato dalin të pastra. Kjo e fundit sipas tij, tregon rezultatet e mira të një klinike.
“Në vendet perëndimore llogaritet deri në 30 për qind e koronarografive të dalin të pastra. Kjo përqindje tregon suksesin e trajtimit të pacientëve dhe parandalimin e sëmundjeve të zemrës. Nëse qind për qind e koronarografive dalin me sëmundje, atëherë ky është rezultat i dobët i trajtimit të pacientëve sepse kemi lejuar që rastet të vijnë deri tek infarkti dhe vetëm atëherë i kemi futur në koronarografi”, thotë Jashari, shkruan Gazeta Shneta.
Mjeku thekson se ekzistojnë edhe metoda tjera që diagnostikojnë sëmundje koronare mirëpo asnjë nuk garantojnë rezultat të qind për qind me përjashtim të koronarografisë. Ai thotë se kjo metodë kërkohet për rastet kur dyshohet se ka sëmundje koronare, megjithëse dyshimet mund të rezultojnë të gabuara. Por nëse kardiologët e keqpërdorin koronarografinë, atëherë Jashari kërkon nga Bekteshi që të informohet dhe të krijohen komisione profesionale për t’i verifikuar këto raste.
“Vlerësimi i asaj nëse është për koronarografi apo jo, mund të ketë gabime, mirëpo secili kardiologë e ka përgatitjen, eksperiencën dhe logjiken për qasjen ndaj sëmundjeve koronare. Nëse vërtet ekziston që mjekët e Kardiologjisë të referojnë pacientë për koronarografi pa nevojë, atëherë e kisha lutur drejtorin e Shërbimit të Kardiokirurgjisë të më informojë dhe të formojmë një komision profesional për të verifikuar kandidatët. Mirëpo jam kundër asaj që të globalizohen gjërat sepse në Klinikën e Kardiologjisë janë 20 kardiologë të cilët kanë përvojë duke filluar me mbi tri dekada dhe të futet edhe ai në grupin e atyre që referon pacientë pa pasur nevojë, kjo është një akuzë, nuk është në të mirë të profesionalizmit dhe kolegialitetit”, ka deklaruar Jashari.
Ai thotë se kardiologët duhet të jenë shumë të kujdesshëm pasi mund ta shpallin një pacient me status koronar në rregull, mirëpo pas një kohe mund të pësojë infarkt dhe pastaj të shihen ndryshimet masive.
Por kjo nuk është deklarata e vetme e Bekteshit kundër Klinikës së Kardiologjisë. Ai pati folur edhe në një konferencë për media pas akuzave nga Dr. Gani Bajraktari për rritjen e numrit të vdekjeve tek pacientët në Kardiologjinë Invazive. Bekteshi pati thënë në këtë konferencë se nevojitet më tepër kujdes ndaj pacientëve që kanë kryer stentimin, në njësinë koronare.
Jashari nuk ka pranuar të komentojë këto deklarata. “Edhe ajo deklaratë nuk ka qenë e mirë dhe nuk kam dashur e nuk dua të prononcohem rreth saj. Ekziston një fjalë se çka të hidhet lartë të kthehet poshtë”, ka thënë Jashari. /Gazeta Shneta/