Në bashkëpunim me Komunën e Prishtinës, Coca-Cola HBC Kosova ka inauguruar parkun e parë të të martuarve në Prishtinë, në hyrjen kryesore të qytetit.
Me normat e ndotjes që tejkalojnë normalen në Prishtinë, ky projekt është realizuar në përpjekjet për të ulur ndotësit e ajrit dhe për të përmirësuar cilësinë e jetës së qytetarëve.
Pas ceremonisë së kurorëzimit, të sapo-martuarit në Komunën e Prishtinës do të inkurajohen të mbjellin një pemë në këtë zonë.
Parku ka kapacitet për mbjelljen e 120 drunjve, i cili krijon një oazë të vogël në një nga kryqëzimet më të ngarkuara të qytetit me kapacitet për të absorbuar rreth 200,000 kg CO2 për 10 vitet e ardhshme.
Nerita Tira, drejtor i Coca-Cola HBC Kosova, tha se ruajtja e mjedisit është përgjegjësi për të gjithë qytetarët, të cilët duhet të përkujdesen edhe për këtë park, në mënyrë që t’i shërbejë komunitetit edhe për shumë vite duke ndikuar në uljen e ndotjes së ajrit.
Ndërsa, ambasadori amerikan Greg Delawie, u bëri thirrje bizneseve që të mbështesin aktivitetet që kanë të bëjnë me ruajtjen e ambientit.
“Shumë kompani amerikane mbështesin aktivitetet e të rinjve që kanë të bëjnë me mjedisin. Inkurajoj edhe bizneset në Kosovë që të mbështesin këto aktivitete, dhe pres të shoh frytin në ditët në vijim”, tha Delawie.
Kryetari i Prishtinës, Shpend Ahmeti përgëzoi realizimin e këtij parku, duke theksuar rëndësinë e lartë që ka për anëtarët e komunitetit tonë.