Federata e Sindikatave të Shëndetësisë së Kosovës ka reaguar pas sulmit fizik ndaj infermierit të Urgjencës në Qendrën Kryesore të Mjekësisë Familjare në Mitrovicë, Gzim Musliu, i cili u sulmua mbrëmjen e 6 tetorit 2025 gjatë orarit të punës nga një pacient.
Në reagimin e saj, FSSHK ka shprehur indinjatën dhe shqetësimin e thellë për këtë ngjarje, duke e cilësuar dhunën në vendin e punës si të papranueshme dhe të rrezikshme për integritetin fizik e moral të profesionistëve shëndetësorë, shkruan Gazeta Shneta.
“Dhuna fizike në vendin e punës është e papranueshme dhe cenon jo vetëm integritetin e profesionistëve tanë, por edhe dinjitetin e sigurinë në institucionet publike shëndetësore,” thuhet në reagim.
Federata i ka bërë thirrje institucioneve kompetente, përfshirë Policinë e Kosovës, Prokurorinë dhe autoritetet komunale, që të ndërmarrin veprime të menjëhershme për zbardhjen e rastit dhe për mbrojtjen ligjore të viktimës.
Po ashtu, FSSHK ka kërkuar nga strukturat menaxheriale të institucioneve shëndetësore të sigurojnë kushte të sigurta pune për të gjithë punëtorët e shëndetësisë dhe të mos ketë vonesa në reagim ndaj akteve të dhunës.
“Shëndetësia nuk mund të funksionojë mbi bazën e frikës dhe pasigurisë. Punëtorët tanë meritojnë respekt dhe mbrojtje të plotë institucionale,” theksohet më tej.
Reagimi i FSSHK-së vjen pas njoftimit nga kryetari i shoqatës sindikale të Mitrovicës, Agim Musa, i cili ka theksuar nevojën për masa urgjente mbrojtëse për të parandaluar raste të ngjashme në të ardhmen./Gazeta Shneta/